Daga; USMAN NASIDI, Kaduna.

A KOKARIN da ake na samar da mafita mai dorewa kan kalubalen tsaro da ake fama da shi a shiyyar siyasar Arewa maso Yamma, Sakataren gwamnatin tarayya, Boss Mustapha, ya bayyana cewa gwamnatin tarayya na kara samar da hanyoyin magance matsalolin da suka shafi rashin tsaro a kasar nan ta kowane hali.

A ranar Alhamis yayin taron kwana biyu na masu ruwa da tsaki na taron karawa juna sani kan kalubalen tsaro da ake fuskanta a shiyyar yankin Arewa maso Yamma da ya gudana a Arewa House, Kaduna, tare da hadin gwiwar hukumar tuntubar tsaro da magance rikici, Boss Mustapha ya bayyana cewa gwamnatin tarayya ta damu da wadannan kalubale kuma tana aiki tukuru don rage su zuwa mafi ƙanƙanta.

Da yake wakilcin SGF a jawabin da ya gabatar, Mista David Attah ya kara da cewa, Najeriya na fama da matsalolin tsaro da dama a sassan kasar, inda ya kara da cewa kalubalen ya janyo asarar rayuka masu kima da kuma raba mutane da dama da kuma barnatar da dukiya ta biliyoyin Naira.

Ya ce “maganin rashin tsaro na daya daga cikin abubuwa uku (3) da gwamnati mai ci ta sa a gaba, ita ce wannan gwamnatin ta dauki matakai masu nisa don magance matsalar rashin tsaro a kasar nan, wasu daga cikin matakan sun hada da karin kasafin kasafi kamar yadda ya kamata da kuma kara yawan kayan aikin da ke rike da Sojoji da sauran hukumomin tsaro.”

“Hakazalika, an amince da daukar ‘yan sanda dubu goma (10,000) na tsawon shekaru uku (3) a jere yayin da aka kara duba albashinsu domin kara musu kwarin gwiwa, da kara kwazo don yin aiki tukuru, don haka abin farin ciki ne a lura da cewa yanayin magance matsalar tsaro ya samu ingantuwa a dukkan sassan kasar.”

“Sama da ‘yan tada kayar bayan dubu talatin da (30,000) da iyalansu ya zuwa yanzu sun mika wuya, bugu da kari kuma barazanar ‘yan awaren yankin Kudu maso Gabas da kuma wasu sassan yankunan siyasar yankin Kudu maso Kudu ya ragu matuka. yanzu hankalinmu ya kwanta kuma ba mu sake samun rahotannin hare-haren da masu zaman kansu ke kaiwa kullum.”

“Dakarun Operation SHARAN DAJI tare da jami’an rundunar ‘yan sandan Najeriya (NPF) da sauran jami’an leken asiri da jami’an tsaro da na soja sun ci gaba da kai hare-hare kan ‘yan ta’addan, wanda a lokacin gwamnatin da dama ta dauki matakai masu nisa don magance matsalar rashin tsaro a kasar.”Inji Shi

A cewarsa, a karshen taron, za a karfafa wa mahalarta taron da su fadakar da sauran al’ummomin yankunansu muhimmancin kokarin hadin gwiwa wajen yaki da miyagun laifuka.

Shima da yake gabatar da nasa jawabin, gwamnan Jihar Kaduna, Malam Nasiru El-Rufa’i, ya bayyana cewa lokacin gudanar da taron ya dace, a matsayin wata shaida da ke nuna aniyar gwamnati na magance kalubalen tsaro da ake fama da shi, yayin da kuma zabar wurin da za a yi, ya nuna dabarun da Jihar Kaduna ke da shi ga kokarin hadin gwiwa na yaki da rashin tsaro a yankin Arewa maso Yamma.

Gwamnan wanda kwamishinan tsaro da harkokin cikin gida na jihar Mista Samuel Aruwan ya wakilta, ya bayyana cewa a lokuta da dama matsalar rashin tsaro na da nasaba da ra’ayin nuna banbance-banbance, kuma idan aka yi la’akari da banbance-banbance Jihar Kaduna, wanda Jihar ta na da kimanin mutane miliyan 10, kana da kananan hukumomi 23 da kuma kabilu kusan 56.

Ya ce, “kamar yadda muka sani, babbar manufar gwamnati ita ce tsaro da jin dadin al’ummarta, matsalolin tsaro da ke fuskantar jihohin Arewa maso Yamma, musamman ‘yan bindiga da ta’addanci, wanda ya zama abin da bai dace ba kuma yake bukatar gwamnati, da kuma kungiyoyi daban-daban domin magance matsalar da ake fuskanta.”

“A zahirin gaskiya, an kafa wannan dandalin ne domin inganta kyakkyawar hulda a tsakanin kungiyoyin da suka dace a fadin yankin. An yi imanin cewa irin wannan huldar za ta amfanar da dukkan masu ruwa da tsaki da kuma sanya su wajen kawar da kalubalen da ake fuskanta a tsakanin al’umma ta yadda ya kamata da samar da matakan rukuni.”

“Idan aka yi rashin sa’a an siyasantar da al’amuran tsaro, masu aikata laifuka su kan jajirce tare da ba su garkuwa don zurfafa aikata laifuka da kuma yada ayyukansu na rashin jin dadi, shi yasa ako yaushe gwamnatin jihar Kaduna ta ke bayyana cewa duka ‘yan kasa gara su gwammace bin doka ta duk hanyar da ta dace koda za a jikkata.” A cewarsa

Daga karshe Malam Nasiru El-Rufa’i, ya mika godiyarsa ga ofishin SGF da sashen ayyuka na musamman, tare da yi wa kowa barka da zuwa Kaduna, tare da yi musu fatan alheri.