Ƙasashen Waje
Isra’ila ta hana al’ummar Gaza tafiya aikin Hajjin bana
Isra’ila ta hana al’ummar Gaza tafiya aikin Hajjin bana
Dubban Falasɗinawa ba za su samu damar zuwa aikin Hajjin bana ba saboda Isra’ila ta mamaye yankin Rafah da ake wucewa domin fita daga yankin Gaza, a cewar Ma’aikatar Harkokin Addini da Awqaf ta Falasɗinu.
“Hana dubban al’ummar Gaza tafiya aikin Hajji keta ‘yancin mutane ne na gudanar da addininsu da ma dokokin ƙasashen duniya,” in ji wata sanarwa da ma’aikatar ta fitar ranar Laraba.
“Wannan sabon laifin yaƙi ne cikin jerin laifukan yaƙin da masu mamaya na Isra’ila suke yi wa al’ummarmu da wuraren gudanar da ibadarmu,” a cewar sanarwar.
Ranar 7 ga watan Mayu sojojin Isra’ila suka mamaye yankin Rafah na Falasɗinu da ke kan iyaka da Masar, kuma nan ne kaɗai hanyar da ake bi wurin fita daga Gaza don zuwa wasu sassan duniya.
Aikin Hajji yana cikin shika-shikan Musulunci kuma wajibi ne ga Musulman da suke da hali aƙalla sau ɗaya a rayuwarsu.
KU KUMA KARANTA: Sojojin Isra’ila sun kama Falasɗinawa 28 a Gabar Yamma da Kogin Jordan
Ma’aikatar Harkokin Addini da Awqaf ta Falasɗinu ta yi kira ga Masar da Saudiyya su matsa lamba kan Isra’ila domin “bai wa al’ummar Gaza damar gudanar da aikin Hajjin bana.”
Ranar 6 ga watan Mayu dakarun Isra’ila suka ƙaddamar da hare-hare a Rafaha da ke kudancin Gaza, inda Falasɗinawa fiye da miliyan 1.5 suke samun mafaka bayan mahukuntan birnin Tel Aviv sun ƙaddamar da hare-hare a yankin.
Hukumar Majalisar Ɗinkin Duniya mai kula da Falasɗinawa ‘yan gudun hijira (UNRWA) ta ƙiyasta cewa fiye da mutum 800,000 sun tsere daga birnin tun da Isra’ila ta kaddamar da hare-hare a watan Oktoban da ya gabata.
Isra’ila ta lalata galibin gine-ginen da ke Gaza, sannan ta hana shigar da kayan abinci da magunguna da samar da ruwa mai tsafta a watannu bakwai da ta shafe tana kai hare-hare a yankin.
Wani harin haɗin-gwiwa na Amurka da Birtaniya ya kashe mutum biyu a Yemen
Sojojin Amurka da na Birtaniya sun sanar cewa sun kai hare-hare kan mayaƙan Houthi da ke Yemen.
Ranar Alhamis kafar watsa labarai ta Houthi ta tabbatar da kisan aƙalla mutum biyu a hare-haren.
Ma’aikatar tsaron Birtaniya ta ce an kai hare-haren na haɗin-gwiwa ne a wurare uku a birnin Hodeidah da ke gaɓar Bahar Maliya.
KU KUMA KARANTA: Sojojin Amurka za su kammala ficewa daga Nijar 15 ga Satumba
Gidan talbijin na Al Masirah wanda ƙungiyar Houthi take gudanar da shi ya ruwaito cewa an kashe aƙalla mutum biyu sannan aka jikkata mutum 10 a hare-haren da aka kai a wani gini na gidan rediyo a lardin Al-Hawk na birnin Hodeidah.
Kenya ta soma sauraron ƙararraki kan zargin cin zarafi da sojojin Birtaniya suka yi
Kenya za ta soma zaman sauraren ƙararrakin jama’a a ranar Talata kan zargin take hakkin ɗan’adam da kuma cin zarafi da sojojin Birtaniya suka yi a kasar wadda ta taba yi wa mulkin mallaka.
Sashen horar da sojojin Birtaniya a Kenya (BATUK) wuri ne na tafiyar da ayyukan da suka shafi tattalin arzikin mutane da dama a tsakiyar garin Nanyuki, inda aka kafa sansanin soji na dindindin, amma kuma ana zargin sojojin da ke wurin da aikata laifuka ciki har da kisan kai.
Ɗaya daga cikin manyan laifuka da suka fi ɗaukar hankali a shekarar 2012, shi ne na tsintar gawar wata mata ‘yar ƙasar Kenya a cikin wata rijiya a Nanyuki, inda ganinta da rai na ƙarshe da aka yi tare da wani Sojan Birtaniya ne.
Iyalan Agnes Wanjiru sun shigar da ƙara a Kenya kan mutuwar matashiyar mai shekaru 21, amma babu wani ci gaba da suka samu kan shari’ar, inda aka yi ta ɗage sauraron ƙarar.
Yanzu dai ana sa ran sake sauraron ƙarar a ranar 10 ga watan Yuli kamar yadda kafafen yada labarai na ƙasar suka rawaito.
A makon jiya ne majalisar dokokin Kenya ta sanar da cewa za ta gudanar da zaman sauraron ƙararrakin jama’a har guda hudu ciki har da na Nanyuki kan cin zarafin da ake zargin sojojin Birtaniya da aikatawa a ƙasar.
Za a yi zaman sauraron ƙararrakin ne tsakanin ranakun Talata da Alhamis na wannan makon inda za gudanar da ”bincike kan zarge-zargen take hakkin bil’adama da suka haɗa cin zarafi da azabtarwa da tsare mutane ba bisa ka’ida ba da kuma kashe- kashe,” a cewar wata sanarwar da majalisar ta fitar.
KU KUMA KARANTA: Ana fargabar zaftarewar ƙasa ta rutsa da mutane da dama a Kenya
Kazalika zaman zai yi duba kan “zargin take hakkokin ɗa’ar aiki da suka haɗa da cin hanci da rashawa da aikata zamba da kuma nuna wariya da cin zarafi da sauran munanan dabi’u.”
Birnin Landan da Nairobi suna takun-saƙa kan batun hukunta sojojin Birtaniya da suka take dokokin Kenya, inda a baya gwamnatin Birtaniya ta ce ba ta amince da hurumin kotun Kenya na bincike kan kisan Wanjiru ba.
Da yake amsa tambayoyi kan sauraron karar na wannan makon, mai magana da yawun hukumar Biritaniya ya shaida wa kamfanin dillacin labarai AFP cewa: “Hukumar Birtaniya a Nairobi da BATUK suna da niyyar ba da hadin kai ga binciken.
“Haɗin gwiwar ayyukan tsaro na Birtaniya da Kenya na ɗaya daga cikin manyan ginshiƙan dangantakarmu kuma horon da muke samarwa ta haɗin gwiwa da ayyukan da muke yi tare suna taimakawa wajen samar da tsaro ga al’ummar Kenya da Birtaniya,” in ji shi.
A ranar Alhamis din da ta gabata ne tawagar Birtaniya ta ce babban kwamishinanta Neil Wigan ya gana da iyalan Wanjiru, waɗanda suka dade suna neman a yi musu adalci kan kashe ta da aka yi.
“Taron ya ba da dama ga Babban Kwamishinan ya saurari ‘yan’uwan marigayiyar tare da yi musu ta’aziyya. Kazalika ya samu damar jaddada matsayar Birtaniya na ci gaba da bayar da cikakken haɗin kanta ga binciken da Kenya ke yi kan (mutuwar Misis Wanjiru),” in ji sanarwar.
A watan Oktoban 2021 ne, Jaridar ‘The Sunday Times’ ta Biritaniya ta ruwaito cewa wani soja ya shaida wa abokansa cewa sun kashe Wanjiru kuma ya nuna musu gawarta.
Rahoton ya yi zargin kan cewa an sanar da manyan jami’an soji game da kisan, amma ba a dauki wani mataki akai ba.
An ƙaddamar da bincike kan batun ne a shekarar 2019 amma ba a bayyana sakamakon ba ga al’ummar.
‘Yan sandan Kenya sun sanar da cewa za a sake buɗe binciken bayan rahoton da Jaridar Sunday Times ta fitar.
Iyalan Wanjiru sun shigar da karar sojojin Birtaniya a Kenya da kuma ‘yan sanda da jami’an shari’a da na siyasa na Kenya kan batun mutuwarta.
Ana lalata mutuncin bil’adama a Gaza – Ministan Turkiyya
Ministan Lafiya na Turkiyya ya ce ana lalata mutuncin bil’adama a Gaza a yayin da ake ci gaba da kai hare-hare ba kan fararen hula ba har ma da cibiyoyin kiwon lafiya.
A wani taron Majalisar Lafiya ta Duniya (WHA) a Geneva, Fahrettin Koca ya ce “A Gaza, ana lalata mutuncin bil’adama a gaban dukkan idanunmu, ana yi mata rugu-rugu.”
KU KUMA KARANTA: An yi zanga-zangar neman ƙasashen Musulmai su tura sojoji don taimaka wa Falasɗinawa a Gaza
“An ga cewa ƙasashen da ke iƙirarin ci gaba su ne a baya sosai a fannin darajta dan’adam, sun gwammace su yi shiru yayin da ake kashe yara da jarirai da hanyoyin a salon da ake tunanin ya gushe a duniya,” in ji shi. Ya ƙara da cewa:
“Wadanda ake kiran sun fi kowa ci gaba a fannin dimokuradiyya su ne masu ƙin mayar da hankali kan kukan al’umma”.
“Dukkanmu mun kasance fursunonin wannan baƙin tarihi” ya ce.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai8 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano