Siyasa
Abin da yasa daraktar yaƙin neman zaɓen Tinubu, Naja’atu Mohammed, ta fice daga APC
Daraktar ƙungiyar farar hula ta kwamitin yaƙin neman zaɓen shugaban ƙasa na jam’iyyar APC, Naja’atu Mohammed, ta yi watsi da jam’iyya mai mulki, sakamakon haka ta yi murabus daga muƙaminta
A cikin wata wasika mai ɗauke da kwanan wata, 19 ga watan Janairun 2023, kuma zuwa ga shugaban jam’iyyar APC na ƙasa Abdullahi Adamu, Naja’atu ta ce abubuwan da suka faru a fagen siyasa da dimokuraɗiyyar ƙasar nan ya sa ta kasa ci gaba da shiga harkokin siyasar jam’iyyar.
Naja’atu Mohammed, wadda ita ce kwamishiniyar ƙasa a hukumar kula da ayyukan ‘yan sanda, PSC, ta ce ƙalubalen da Najeriya ke fuskanta na bukatar ta ci gaba da fafutukar ganin an samar da ƙasa mai inganci da sanin ya kamata.
“Wasikar ficewa daga jam’iyyar APC mai lamba 9.5 (i) na ƙundin tsarin mulkin jam’iyyar APC, na rubuto muku ne domin in sanar da ku cewa na yi murabus daga jam’iyyar APC,” kamar yadda wasikar ta bayyana.
KU KUMA KARANTA:Tinubu/Shettima: Wannan tikitin babbar nasara ce ga Jam’iyyar APC – Gwamna Buni
“Ina da wannan wasiƙar kuma na sanar da ku murabus na a matsayin darakta na hukumar kamfen ɗin ɗan takaran shugaban ƙasa na APC.
“Babban abin alfahari ne a yi aiki tare da ku don ba da gudummawa don gina al’ummarmu mai daraja.
“Duk da haka, da dama daga cikin abubuwan da suka faru a baya-bayan nan a fagen siyasa da dimokuraɗiyyar ƙasar, sun sa ba zan iya ci gaba da shiga harkokin siyasar jam’iyyar ba.
“Ƙalubalen da Najeriya ke fuskanta a yau na buƙatar in ci gaba da fafutukar neman ƙasar da ta dace da lamiri mai kyau yayin da nake ci gaba da kasancewa da cikakken biyayya ga kƙasata Najeriya.
“Ka yarda da kyakkyawar godiyata ga shugabancinka a matsayinka na shugaban jam’iyyar APC. Allah ya raya mana tarayyar Najeriya.” in ji ta.
A wata sanarwa ta daban da ta fitar a ranar Asabar, ‘yar gwagwarmayar ta ce ta fice daga siyasar ɓangaranci saboda jam’iyyun ba su da wani aƙida.
“Bayan na yi nazari da nazari sosai, na yanke shawarar rabuwa da siyasar jam’iyya. Na fahimci cewa ɗabi’ata da imanina ba su dace da siyasar jam’iyya ba.
Jam’iyyun siyasarmu ba su da bambance-bambancen aƙida kuma kawai riguna ne da ‘yan siyasa ke sanyawa don biyan buƙatunsu da buƙatun kansu a kowane lokaci.
A dalilin haka ne muke ganin ‘yan siyasa suna canza sheka daga wannan riga zuwa waccan a duk lokacin da ya dace da su”.
Ta yi nuni da cewa ta gwammace ta goyi bayan ɗauɗaikun ‘yan siyasa su marawa jam’iyyun siyasa baya.
“Abin da ke da muhimmanci a wannan lokaci shi ne wanda yake sanye da rigar ba rigar kanta ba.
Na himmatu wajen tallafa wa ɗaiɗaikun mutanen da ke da sha’awar magance tushen matsalolinmu a matsayinmu na ƙasa.
Don ci gaba da kasancewa masu gaskiya ga irin waɗannan alkawuran, dole ne mutum ya kasance a shirye ya ɗauki ƙarfin hali da yanke hukunci.
“Barin siyasar jam’iyya a wannan lokaci na daya daga cikin irin wadannan matakai, dukkanmu mun san cewa Najeriya na fuskantar ƙalubale da dama da suka haɗa da rashin tsaro, fatara, rashin daidaito, da rashin samun wadatattun ababen more rayuwa.
Irin waɗannan ƙalubalen suna buƙatar ƙwaƙƙwaran ƙwararrun jagoranci masu kishin ƙasa a kowane mataki na gwamnati.
“Dole ne ‘yan Najeriya su san tsananin halin da suke ciki bayan gazawar shugabanci da ƙasar ke fuskanta tsawon shekaru.
“Lallai ne ‘yan Najeriya su san illar hukuncin da suka yanke da kuma zabinsu.
Don haka, zabar wanda zai zama jam’iyya guda zai kawo illa ga ci gaban kasarmu da dimokuradiyyar mu.” in ji ta.
APC ta dakatar da ɗan Majalisa kan cin amana a Zamfara
Jam’iyyar APC reshen Jihar Zamfara ta dakatar da Ɗan Majalisar Wakilai, Aminu Jaji bisa wasu zarge-zargen da ake yi masa na cin amanar jam’iyyar.
Sakataren Yaɗa Labarai na Jam’iyyar APC na Jihar, Malam Yusuf Idris ne ya sanar da dakatarwar a wani taron manema labarai a Gusau a ranar Juma’a.
Kamfanin Dillancin Labaran Najeriya (NAN) ya ruwaito cewa, Jaji yana wakiltar mazaɓar Ƙaura-Namoda/Birnin-Magaji a Majalisar Wakilai a ƙarƙashin jam’iyyar APC.
Idris ya ce wasu zarge-zargen da ake yi wa Ɗan Majalisar sun haɗa da aikata rashin gaskiya da rashin zuwa tarurrukan jam’iyyar da kuma sauran ayyuka.
KU KUMA KARANTA: Kotun Najeriya ta bayar da umarnin dakatar da asusun banki fiye da dubu 1
Ya ce, matakin ya biyo bayan sanarwar dakatarwar da aka yi wa Jaji daga shugabannin jam’iyyar APC na mazaɓar Birnin-Magaji bisa zargin cin amanar jam’iyyar da dai sauran abubuwan da suka saɓa wa jam’iyyar.
Idris ya ce, “Kwamitin zartaswa na jam’iyyar APC na ƙaramar hukumar Birnin Magaji ne ya miƙa sanarwar dakatarwar zuwa hedikwatar jam’iyyar APC ta jihar.
Bayanai sun ce kwamitin zartaswar jam’iyyar APC na jihar ya gudanar da taron gaggawa a sakatariyar jam’iyyar da ke Gusau a ranar Juma’a 17 ga watan Mayu, 2024, inda aka gabatar da batun dakatar da Jaji ga ‘yan majalisar zartarwar jihar.
Tsohon gwamnan jihar Katsina, Ibrahim Shema, a hukumance ya koma jam’iyyar APC Mai mulki a jihar.
Shema, ya kasance gwamnan jihar a tsakanin shekarar 2007 zuwa 2015, a ƙarƙashin jam’iyyar PDP.
Tsohon gwamnan ya yi rajista ne a ofishin jam’iyyar na mazaɓar Shema, ƙaramar hukumar Dutsin-ma, inda shugaban jam’iyyar na jihar, Sani Aliyu-Daura ya ba shi katin zama ɗan jam’iyyar APC.
Lambar katin Shema ta zama ɗan jam’iyyar ita ce: 26551.
KU KUMA KARANTA:Gwamnatin Yobe za ta mayar da kwale-kwalen Dufuna mai shekaru 8,000 zuwa cibiyar yawon buɗe ido
Malam Aliyu-Daura ya yabawa Gwamna Dikko Raɗɗa da kuma tsohon gwamnan jihar Aminu Masari wanda ya gada, a bisa rawar da suka taka wajen ganin Shema ya sauya sheƙa.
Don haka ya tabbatar wa tsohon gwamnan cewa za a yi masa adalci kamar kowane ɗan jam’iyya.
Shugaban ma’aikata na Raɗɗa, Jabiru Abdullahi-Tasuri, shi ne ya miƙa katin zama ɗan jam’iyya ga Shema a madadin gwamnan a jiya Alhamis a Dutsin-ma.
Banji Ajaka, kwamishinan lafiya na jihar Ondo, ya gamu da fushin matasa a jiya Asabar yayin da ake gudanar da zaɓen fidda gwani na gwamna na jam’iyyar APC mai mulki a jihar.
Daily Trust ta gano cewa Dakta Ajaka, wanda ke Mazaɓar Ugbo 3, a ƙaramar hukumar, ana zarginsa da ɓoye takardar sakamakon zaɓen.
Shaidu sun tabbatar da faruwar lamarin a wata tattaunawa da suka yi da manema labarai, inda suka yi zargin cewa fusatattaun matasan ‘ya’yan jam’iyyar APC ne da ke adawa da tsarin da aka bi wajen gudanar da zaɓen.
Ɗaya daga cikin waɗanda suka shaida lamarin, wanda ya nemi a sakaya sunansa, ya bayyana cewa rikicin ya faro ne lokacin da ‘yan ɗaya ɓangaren na jam’iyyar suka buƙaci ganin takardar sakamakon zaɓen na fidda gwani.
KU KUMA KARANTA:An yi jana’izar tsohon gwamnan Ondo, Rotimi Akeredolu
“Sun fusata ne suka buƙaci jami’in zaɓe ya ba su takardar sakamakon zaɓen sai kuwa ya ce ta na wajen Ajaka.
“Don haka suka yi masa duka a wurin, inda kuma garinsu ne. Jama’a sun fusata sosai da lamarin, inda rigimar ta ƙare a wajen.”
Da yake tabbatar da faruwar lamarin, Dakta Ajaka ya ce an zarge shi ne da riƙe takardar sakamakon zaɓen.
Ya yi bayanin cewa a lokacin da yake ƙoƙarin bayyana kansa, ’yan daban sun auka masa inda suka yi masa mugun duka.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai10 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano