Wadanda suka sace matan Shugaban Ƙaramar Hukumar Kiyawa da ke Jihar Jigawa, Nasiru Ahmad, su biyu, sun sake su.
An sace matan ne a ƙaramar hukumar Ningi ta jihar Bauchi a ƙarshen makon da ya gabata.
Kakakin Rundunar ’yan sandan jihar, DSP Lawan Shiisu Adam, ne ya tabbatar da sako matan biyu da maraicen Talata.
Ya ce bayan sakin nasu, an garzaya da su babban asibitin Dutse domin duba lafiyarsu.
KU KUMA KARANTA: ‘Yan bindiga sun sace matan shugaban ƙaramar hukuma
Sai dai bai yi ƙarin haske a kan ko an biya kuɗin fansa ba kafin a saki matan.
Idan ba a manta ba, a ranar Juma’a ne wasu ’yan bindiga suka kutsa kai gidan Ciyaman ɗin, sannan suka yi awon gaba da matan.
Maharan sun shiga garin ne da dare inda suka dinga harbi babu kakkautawa, kafin daga bisani suka shiga gidan kai-tsaye suka tafi da matan.
