NNPCL ta ƙulla yarjejeniyar samar da iskar gas na shekaru 10 da matatar man Ɗangote
A cewar NNPCL, haɗin gwiwar wani muhimmin mataki ne na tabbatar da nasarar ɗorewar ayyukan matatar ta Ɗangote tare da inganta amfani da iskar gas a cikin Najeriya.
Kamfanin man fetur ɗin Najeriya (NNPCL) ya sanar da cewa reshensa dake harkar cinikayyar iskar gas (NGML), ya yi nasarar kulla wata yarjejeniyar cinikyar gas (GSPA) tsakaninsa da matatar man Dangote da sarrafa sinadarai (FZE).
Hakan na kunshe ne a cikin sanarwar da babban jami’in yada labaran NNPCL, Olufemi Soneye, ya fitar a jiya Laraba.
KU KUMA KARANTA:Kamfanin NNPCL ya sake ƙara farashin man fetur
A cewarsa yarjeniyar, da Manajan Daraktan, NGML, Barista Justin Ezeala da shugaban rukunin kamfanonin Dangote, Aliko Dangote suka rattabawa hannu a shelkwatar kamfanin Dangoten dake unguwar Falomo ta jihar Legas, ta zayyano batun samar da iskar gas domin samar da lantarki da sauran makamashi a matatar ta Dangote, dake yankin Ibeju-Lekki, na jihar Legas.
A karkashin sharudan yarjejeniyar, NGML zai samar da cubic feet miliyan 100 na iskar gas a kowace rana, za’a samar da cubic feet miliyan 50 na iskar gas babu yankewa a kullum sannan ragowar za’a rika samar da ita a yanyanke ga matatar tsawon shekaru 10 na farko, tare da zabin sabuntawa da bunkasawa.
A cewar NNPCL, haɗin gwiwar wani muhimmin mataki ne na tabbatar da nasarar dorewar ayyukan matatar ta Ɗangote tare da inganta amfani da iskar gas a cikin Najeriya.
