Ilimi
Ba Karamin Hubbasa Gwamnatin Yobe Ta Yi Na Kokarin Farfado Da Shirin Ilimi Ba – Hon. Zakariyau
Daga; Bashir Bello, Majalisa Abuja.
A SAKAMAKON ire-iren kalubalen daya ta’azzara wanda ya addabi bangarorin Arewacin Najeriya musamman ta fannin harkar tsaro, Gwamnatin Jihar Yobe ta yi yunkurin ganin cewa ta canza tsarin Ilimin Jihar da Kokarin ganin farfadowar sashen wanda ya samu nukusani a yankin.
Dan Majalisar Tarayya mai wakiltar mazabar Bade/Jakusko ta Jihar Yobe, Honarabul Zakariyau Galadima kuma shugaban kwamitin Dangantakar Tsakanin Majalisar a hirarsa da yan Jaridu, ya bayyana cewa abu ne wanda kowa ya sani irin kalubalen tsaro da aka samu a Jahohin Arewa na gabas amma yanzu Gwamnatin Jihar Yobe ta yi yunkurin tabbatar da samun nasara a fannin ilimin.
Ya kara da cewa abubuwan da aka lalata basu tsaya ga gine-gine ba har hanyoyi da gadoji, lamarin ya kai ga durkusar da harkokin Ilimi na wasu makarantu da dama a Jihar Borno da Yobe, amma cikin ikon Allah lokacin da suka samu shugaba mai duba al’amuran al’ummarsa, Allah Ya taimaka sun yi nasarar Farfado da harkar Ilimi a Jihar.
Ya ce “Allah Ya taimake mu an samu shugaba mai kishi wanda ya tsaya kai da fata don ganin halin da aka shiga na ta’adin yan ta adda da ya shafi harkar Ilimi, domin ba bu maganin wannan abun illa Jihar Yobe tasa a farfado da wannan sashen ta hanyar neman taimako a wajen al’ummar kasa baki daya wanda hakan yasa yan Jihar suka tara wani kudi daidai gwargwado tare da taimakon kananan hukumomi da masarautu.”
“Bayan wannan, aka zo aka bude asusun kasa baki daya don al’ummar kasa su taimaka, wanda Inshaa Allah za ayi matukar amfani da ita ta hanyar daya dace domin Gwamnan ya tsara wani Kwamiti wanda zasu gudanar da sarrafa wannan Kudi don a tabbatar da anyi amfani da Kudin ta hanyar daya dace.”
“Kuma za aye amfani da wannan Kudi ta fannin ilimi domin kula da duk abinda suka lalace a gyara. A Jihar Yobe muna da tsari domin idan ba a manta ba, tun lokacin Bukar Abba Ibrahim ya budi baki ya ce Bukar basa karewa a Jihar saboda idan wannan Bukar din ya sauka, wani Bukar din zai zo ya hau domin a kan wannan tsarin muke kuma wani abu ne mai karfi wanda ya kamata a yabawa Gwamnan.”
Honarabul Zakariyau, ya ci gaba da cewa basu da shakka ko kokwanto balle tsoro a kan yin hakan wanda idan wani yazo ya sauka daga teburinsa ko ya gama a kan inda yake, wani idan shi ma yazo anan zai ci gaba domin suna da yakinin a kan yin hakan domin wani al’amari ne wanda tun fil’azal sun saba da yin shi saboda ci gaban al’ummar Jihar.
Hakazalika, da yake tsokaci kan kudirin Majalisar Tarayya bisa gurbataccen man fetur da ake fama da shi a kasar, ya nuna jindadinsa game da yadda Majalisar ta tsaya kai da fata don ganin cewa an warware matsalar man da al’umma ke fuskanta domin ako yaushe aka samu akasi na gudanarwa ta fannin kasuwanci, da ya shafi al’umma, ya kamata shugabanni su nuna jajircewar su akai a samu maslaha akan lamarin.
Acewarsa, duk wani abun daya shafi al’ummar Kasar wanda ko da ba kyauta zasu shashi ba da Kudin su ne zasu saya kamar man fetur din ko abinci ne, muddun aka samu akasi a cikin shi, toh alamu na nuna akwai munafurci a ciki, ko dagangar ko a rashin sani aka yi, toh ba za a sani ba har sai an bincika ansan mene ne, dalilin faruwar lamarin.
A karshe, ya shawarci Gwamnati da ta dauki matakin sakawa al’ummar Kasar daidai gwargwado bisa asarar da suka yi, kana da yaba wa irin wannan kudiri da manufofin Majalisar domin muddun idan ba su tsaya kan irin wannan al’amarun ba, alamun hakan na nuna gazawarsu.
Gwamnatin Katsina ta jaddada manufarta na ci gaba da bayar da horo ga malaman makaranta
Daga Idris Umar, Zariya
Kwamishinar kula da ilimin firamare da na Sakandire ne ta bayyana ƙudirin gwamnatin jihar mai ci yanzu na ci gaba da bayar da ƙarin horo ga malamai a faɗin jihar don samar da ƙwararrun malamai da suka iya sarrafa na’ura mai ƙwaƙwalwa da za su yi gogayya da takwarorinsu a faɗin duniya.
Hajiya Zainab Musa Musawa ta bayar da tabbacin hakan ne a lokacin da ta kai ziyarar duba yadda shirin horar da malamai 10,000 da suka haɗa da sabbin ɗauka 7,000 a kan dabarun koyarwa na ƙarni na 20 ke gudana.
Kwamishinar ta kai ziyarar ne a makarantar firamare ta Modoji inda ake gudanar da bayar da horon na yini 3 wanda Ma’aikatar kula da ilimin firamare da na Sakandire, hukumar ilimin bai ɗaya da kuma haɗin gwiwa da shirin bunƙasa ilimi matakin jiha (TESS) suka shirya.
KU KUMA KARANTA: Da ilimi ake samun kowace irin nasara a rayuwa – Dauda Lawal
Hajiya Zainab Musa Musawa wanda ta zagaya azuzuwa ta kuma tattauna da masu bayar da horon da Kuma malaman, ta bukace su da suyi amfani da lokacin su fahimci Abunda aka koyamasu don bunkasa tsarin koyo da koyarwa a jihar.
A yayin ziyarar dai Kwamishinar ta samu rakiyar Babbar Sakatariya a Ma’aikatar Hajiya Mairo Mohamed Othman, Mai baiwa Gwamna shawarma akan ilimi Nura Sale Katsayal sauran Daraktocin Ma’aikatar.
Bayanin hakan na ƙunshe a cikin wata sanarwa wadda jami’in hudda da jama’a na Ma’aikatar Malam Sani Ɗanjuma Suleiman ya Sanyama hannu a katsina.
Da ilimi ake samun kowace irin nasara a rayuwa – Dauda Lawal
Daga Idris UMAR, Zariya
Gwamna Dauda Lawal ya halarci taron yaye ɗalibai karo na uku da na huɗu na Jami’ar tarayya, wanda ya gudana a filin taro na Jami’ar da ke Gusau a cikin satin da ya gabata
Mai magana da yawun gwamnan, Sulaiman Bala Idris ne ya bayyana haka a cikin wata sanarwa da ya fitar ranar Litinin a Gusau cewa, Gwamna Lawal ya shelanta bayar da gurbin karatu ga duk wanda ya zo na ɗaya a Jami’ar.
Cikin jawabinsa a wurin taron, Gwamnan ya yaba wa shugabannin Jami’ar game da yadda suka iya ririta ɗan abin da suke da shi, duk da ɗimbin ƙalubalen da suke fuskanta.
Ya ce, “Ina matuƙar farin cikin kasancewa da ku yau a wannan bikin yaye ɗalibai karo na uku da na huɗu a wannan jajirtacciyar Jami’a, Jami’ar gwamnatin tarayya ta Gusau.
Ina taya jami’ar nan murnar samun wannan nasara, duk kuwa da matsalolin da suke fuskanta tun lokacin da aka kafa ta. Ina kuma yaba wa iyaye da ɗalibai bisa sadaukarwar da suka nuna har zuwa wannan matsayi.
Muna sa ran samun makoma mai kyau kuma mai albarka duk da tarin ƙalubalen da muke fuskanta a matsayinmu na jiha kuma al’umma.
Muna yin addu’a kuma muna aiki ba dare ba rana don samar da makoma mai kyau. Duk waɗannan matsaloli za su wuce da izinin Allah Maɗaukakin Sarki.”
Gwamnan ya yi ƙarin haske kan ƙoƙarin gwamnatinsa na gyara harkar ilimi a Jihar Zamfara bayan kafa dokar ta-ɓaci a bara.
“A matsayinmu na gwamnati, mun ƙuduri aniyar ilimantar da duk ’ya’yan Zamfara. Ilimi shi ne ginshiƙin da ke haskaka ruyuwar ɗan adam.
“Mun ware maƙudan kuɗaɗe ga ɓangaren ilimi a cikin kasafin kuɗinmu na 2024 kuma muna fatan za mu kai ga babban matsayi a 2025, 2026, da 2027. Muna fatan cimma kashi 25 zuwa 30 na haɓaka tsarin ilimi.
Tare da samar da ingantaccen tsari a fannin da sarrafa albarkatun da ya ƙunsa, muna da ƙwarin gwiwar cewa za mu farfaɗo da ababen more rayuwa, ɗaukar ƙwararrun malamai, horarwa da sake horar da waɗanda ake da su.
“Za kuma mu ƙara yawan masu karatu a makarantun firamare da na gaba da firamare ta hanyar wayar da kan jama’a da samar da ingantattun wuraren koyo da koyarwa. Ilimi kyauta ne, kuma muna fatan ya zama wajibi ga kowa.
“Mun kuma yi wa manyan makarantunmu da ke jihar kason kuɗi mai yawa don fara aikin gyara su zuwa matakai masu inganci.
KU KUMA KARANTA:Gwamnan Kaduna zai ba da ilimi kyauta ga ɗaliban Kuriga
A karon farko Jami’ar Jihar Zamfara na shirye-shiryen amincewa da shirin Hukumar Kula da Jami’o’i ta Ƙasa.
Mun umurci ’yan kwangilar da gwamnatin da ta shuɗe ta tilastawa barin wuraren aiki da su koma bakin aiki, kuma muna fatan nan da watanni masu zuwa, rukunin dindindin na jami’ar zai fara aiki. A lokaci guda, NUC za ta amince ga duk kwasa-kwasai.
“Mun karɓi mulki a jihar da gwamnati ta ƙi biyan kuɗaɗen jarrabawar WEAC da NECO har na biliyoyin Naira fiye da shekaru uku.
Dole muka yi shiri na musamman da hukumomin, kuma tun daga lokacin an fara biyan kuɗi a kan kari kuma za a kammala su a kan lokaci.
“A cikin ƙarancin albarkatunmu, za mu ci gaba da bayar da taimako ga jami’a. Burinmu shi ne mu ƙara haɓaka ilimi a jiharmu ta yadda za a samu damarmaki ga ɗaukacin matasanmu da za a horar da su don kai ga ƙololuwar da ilimi ke samarwa.”
Jami’o’in Birtaniya za su fara ɗaukar masu sakamakon jarabawar NECO
Jami’o’in ƙasar Birtaniya na shirin fara daukar daliban Najeriya masu shaidar jarabawar kammala sakandare ta NECO.
Shugaban hukumar shirya jarabawa ta kasa (NECO), Farfesa Ibrahim Wushishi, ya ce Jami’ar Lead da Jami’ar Birmingham City da ke kasar Birtaniya sun tuntubi hukumar kan jarabawar da take shiryawa.
Ya ce jami’o’in sun fara tunanin bai wa daliban Najeriya gurbin karatu da sakamakon jarabawarsu ta NECO.
KU KUMA KARANTA: JAMB zata duba yiwuwar amfani da wayoyin hanu a jarabawar UTME
A fahimtarsa, hakan na nuni da amincewa da ingancin sakamakon jarabawar NECO ne a idanun manyan jami’o’in ciki da wajen Najeriya.
Farfesa Wushishi ya bayyana hakan ne yayin wani taron tattaunawa da ’yan jarida a Abuja ranar Laraba.
Ya ce NECO ta cika sharudan Jami’ar Birmingham City, kuma a halin yanzu suna aiki tukuru kan ganin sun sami cika sharudan jami’ar Lead.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai10 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano