An tsinci gawar Manajan Darakta na wani shahararren otal a Ilorin a ɗaya daga cikin ɗakunan otal ɗin nasa.
Kakakin rundunar ‘yan sanda a jihar Kwara, CSP Okasanmi Ajayi, ya bayyana haka a Ilorin ranar Juma’a cewa wani mai kula da otal din ya kai rahoton wani da ake zargin kisan kai ga ‘yan sanda a Ilorin ranar Alhamis.
Ya ƙara da cewa, nan take aka aika da tawagar jami’an tsaro zuwa otal ɗin, kuma an tarar da marigayin a kwance babu motsi a kan gadon ɗakin otal ɗin.
Mista Ajayi ya bayyana cewa gawar ba ta nuna alamun tashin hankali ba kuma ya ba da tabbacin cewa ‘yan sanda za su ƙara yin bincike kan musabbabin mutuwar.
KU KUMA KARANTA: An tsinci gawar yaro ɗan wata 16 a Bauchi, an cire wasu sassan jikinsa
“Likitoci a wani asibiti sun tabbatar da mutuwar shugaban otal ɗin kuma an ajiye gawar a ɗakin ajiye gawa kafin a gudanar da bincike.
“Za a bayyana cikakken bayanan binciken da wuri-wuri,” in ji Ajayi.
