Tinubu ya bai wa ‘yan wasan Flamingos kyautar Naira miliyan 100 kowannen su
Shugaban kasa Bola Tinubu ya bai wa kowace ‘yar wasan ƙungiyar ƙwallon ƙafa ta mata ta Najeriya ta ‘yan ƙasa da shekara 17, Flamingos, kyautar kuɗi Naira miliyan 100.
Haka kuma, kocinsu ya samu shi ma kyautar Naira Miliyan 100, yayin da kowanne daga cikin masu horaswa ya samu Naira miliyan 50 a matsayin kyauta ta kuɗi.
Uwargidan Shugaban Ƙasa, Oluremi Tinubu, ce ta sanar da kyaututtukan yayin wani taron karrama ‘yan wasan a Fadar Shugaban Ƙasa da ke Abuja ranar Laraba.
Flamingos sun kafa tarihi a baya-bayan nan bayan zama ƙungiyar Afirka ta farko da ta lashe gasar cin kofin duniya ta mata ta FIFA ta ‘yan ƙasa da shekara 17.
Ku kuma karanta: Obi ya bukaci Tinubu ya dakatar da shirin kafa ‘yasandan jihohi sai bayan zaɓen 2027
Shugaban Hukumar Wasanni ta Ƙasa, Shehu Dikko, ya bayyana cewa an zaɓi bai wa ‘yan wasan jarin ajiyar kuɗi maimakon tsabar kuɗi ne domin kare makomarsu, kasancewar mafi yawansu matasa ne.
Ya ce jarin zai kasance na tsawon shekaru biyar, inda zai riƙa samar musu da ribar kashi 12 zuwa 14 cikin ɗari a duk shekara, domin taimaka musu wajen biyan buƙatun karatunsu da horon ƙwallon ƙafa.
Dikko ya ƙara da cewa hakan zai ba ‘yan wasan damar samun babban jari a lokacin da suka manyanta, maimakon karɓar makudan kuɗi tun suna ƙanana.
