Babban Malami a FCE Potiskum, Dakta Mamuda ya rasu, yana da shekaru 62

Al’ummar garin Potiskum sun shiga cikin makoki da juyayi na rasuwar Dakta Abdullahi Mamuda, Babban Malami a Kwalejin Ilimi ta Tarayya (FCET), Potiskum.

Dakta Mamuda ya rasu a ranar Laraba yana da shekaru 62 bayan gajeriyar rashin lafiya. Daktan ya rasu ne a Asibitin Legacy Clinic, Potiskum, inda yake karɓar kulawar likita.

Marigayin fitaccen malami ne kuma malami wanda ya yi wa Kwalejin Ilimi ta Tarayya (FCE), Potiskum hidima, a fannoni daban-daban. Tsohon Shugaba ne (Dean) a Tsangayar (School of Technical Education) kuma Malami ne da ake girmama shi sosai saboda gudummawar da ya bayar ga koyarwa, ci gaban ilimi da ci gaban ilimin fasaha.

Ku kuma karanta: Cikin Ruwan Sama, Islamiyyoyi sama da 700 ne suka fito zagayen Mauludin Annabi (SAWW) a Potiskum

Dakta Abdullahi Mamuda yana da digirin digirgir (PhD) a fannin Automobile Engineering, wanda ke nuna jajircewarsa ga ingancin ilimi da ci gaban sana’a a fannin ilimin fasaha.

Duk dai a cikin aikinsa na hidima ga ilimi, Dakta Mamuda shi ne Shugaban Kwamitin Ilimi na Makarantar Tunawa da Hafsatu Gimba, Potiskum, inda ya ba da gudummawa ga ci gaba da gudanar da makarantar.

Fitaccen ɗan jarida kuma mai taimakon al’umma, Dakta Hassan Gimba, Mawallafin Jaridar Neptune Prime ne gina makarantar. Matsayin Dakta Mamuda a matsayin Shugaban Kwamitin Ilimi ya ƙara nuna jajircewarsa wajen tallafawa ci gaban ilimi a cikin al’umma.

Ya rasu, ya bar mata biyu da ‘ya’ya 18, da kuma sauran dangi, abokan aiki, ɗalibai da abokan hulɗa waɗanda ke jimamin rasuwarsa.

Ɗaruruwan al’umma ne cikin juyayi, ciki har da malamai, shugabannin gargajiya, jami’an gwamnati, ɗalibai, abokan aiki, abokai da membobin al’umma, sun halarci sallar jana’izarsa a Fadar Sarkin Potiskum da misalin ƙarfe 5:00 na yamma a ranar Laraba.

Daga cikin waɗanda suka halarci sallar jana’izar akwai Sarkin Potiskum, Alhaji Umaru Bubaram, tare da sauran manyan mutane da membobin al’umma da yawa.

Yawan jama’ar da suka halarci jana’izar ya nuna girmamawa da tausayi da Dakta Mamuda ya samu a rayuwarsa ta hanyar hidimarsa ga ilimi da kuma al’umma baki ɗaya.

Al’umma da dama ne suka bayyana rasuwarsa a matsayin babban rashi ga Kwalejin Ilimi ta Tarayya (FCE), Potiskum, musamman tsangayar ( School of Technical Education), da kuma Makarantar Hafsatu Gimba Memorial, iyalansa, tsoffin ɗalibai da abokan aikinsa.

Za a yi ta tuna wa da Dakta Abdullahi Mamuda saboda shekarun da ya shafe yana hidima ga ilimi, nasarorin da ya samu a fannin ilimi da kuma gudummawar da ya bayar wajen ci gaban ilimin fasaha a Potiskum da ma wasu wurare.

Allah Ya gafarta masa kurakuransa, Ya ba shi hutu na har abada kuma Ya ba iyalansa, abokan aikinsa, dalibansa da masoyansa juriyar jure rashin. Ameen.