2027: Za a yi rikici a Nijeriya idan har Tinubu bai koma karo na biyu ba – Adeyemi
Tsohon Sanatan da ya wakilci Kogi ta Yamma, Smart Adeyemi, ya yi gargaɗin cewa Najeriya na iya shiga babban rikicin siyasa idan aka yi watsi da tsarin karɓa-karɓar shugabancin ƙasa tsakanin Arewa da Kudu gabanin zaɓen 2027.
Adeyemi ya bukaci ’yan Arewa su goyi bayan sake zaɓen Shugaba Bola Tinubu, domin ya ce ya kamata Kudu ta kammala wa’adin shekaru takwas kafin a mayar da mulki Arewa.
Tsohon Sanatan ya bayyana hakan ne bayan rantsar da shi a matsayin Darakta-Janar na kwamitin yaƙin neman zaɓen shugaban ƙasa na APC a Jihar Kogi, a birnin Lokoja.
Ku kuma karanta: Tinubu ga Atiku: Rashin iya shugabancin ka ne ya sa ka rusa PDP, ka gudu ka bar ta
Ya ce lokacin da tsohon Shugaba Muhammadu Buhari, ɗan Arewa, ke mulki, ’yan Kudu sun mara masa baya har ya kammala wa’adinsa na biyu, don haka bai kamata a nemi karɓar mulki daga Kudu kafin lokacinsa ya cika ba.
Adeyemi ya kuma yabawa Tinubu kan naɗa ’yan asalin Jihar Kogi a muƙaman gwamnatin tarayya, ciki har da Babban Hafsan Sojojin Ƙasa da shugaban Hukumar Kashe Gobara ta Tarayya.
Ya ce jihar na da dalilan goyon bayan Tinubu a zaɓen 2027, yana mai cewa shugaban ya nuna kulawa ga jihar ta hanyar naɗe-naɗe da ayyukan gwamnatinsa.
Haka kuma, tsohon sanatan ya ce dole ne ’yan Najeriya su duba halayya, tarihin shugabanci da cancantar duk wanda ke neman shugabancin ƙasa, maimakon dogaro da burin siyasa kawai.
Ya kuma yi tsokaci kan tsohon Mataimakin Shugaban Ƙasa, Atiku Abubakar, inda ya yi amfani da wasu kalaman tsohon Shugaba Olusegun Obasanjo da rahotannin goyon bayan ɗan Atiku ga gwamnatin Tinubu wajen tambayar burin Atiku na shugabancin ƙasa.


