Muna alhini da juyayin rasuwar Ustaz Yunus Usman – Shugaban kotun ɗa’ar ma’aikata
Shugaban kotun ɗa’ar ma’aikata, Barrister Mainasara Umar Kogo ya bayyana matuƙar kaɗuwarsa kan rasuwar ƙwararren Lauya, Yunusa Ustaz Usman, mai muƙamin SAN, kuma mamba a ƙungiyar Lauyoyi ta ƙasa wanda Allah (T) ya yi wa rasuwa a ranar Laraba 11 ga watan Satumba na 2024,
A cikin saƙonsa na nuna alhini da ta’aziyya ga iyalai da ‘yan’uwan marigayin wanda aka rabawa manema labarai a Abuja, Barr Mainasara ya bayyana marigayi Chief Yunus Ustaz Usman a matsayin mai tsoron Allah da kishin ƙasa ga shi da nuna ƙauna ga kowa da kowa da haƙurin zama da jama’a wanda hakan ya zama ginshiƙin gina ƙasa da wanzar da zaman lafiya,
Ya ƙara da cewa, cikin juyayi muna tawakkali ga Allah ina sanar da rasuwar ɗan’uwan mu kuma babban abun koyin mu marigayi Chief Yunus Ustaz Usman.
KU KUMA KARANTA: Allah Ya yi wa mahaifiyar tsohon shugaban ƙasa Yar’Adua rasuwa
Barrister Mainasara ya ce rashin zaƙaƙurin mutum kamarsa ba wai rashi ne ga iyalansa ba, amma rashi ne ga Al’ummar Najeriya gaba daya tare da yin addu’ar Allah SWT ya jikansa da rahma yasa jannatul firdausi ce makomarsa tare da mika ta’aziyarsa ga yan uwa da abokan arziki a wannan lokaci na juyayin,
Tuni dai aka yi jana’izar marigayi Barrister Chief Yunus Ustaz Usman kamar yadda addinin musulunci ya tanadar a garin Kaduna, Marigayin haifaffen garin Ogbogodo a karamar hukumar Dekina ta jihar Kogi ne, ya rasu yana da shekaru 67 a duniya.
