'Yansanda
Harin ‘yan bindiga a Masallaci ya jikkata mutane da dama a Delta
Wasu ‘yan bindiga da ba a san ko su waye ba da safiyar Juma’a, sun kai hari a wani masallaci da ke Ughelli a jihar Delta, inda wasu masallata 11 suka jikkata.
Wani mazaunin garin da ya zanta da kamfanin dullancin labarai na Najeriya (NAN) ta wayar tarho, ya ce harin ya faru ne da misalin ƙarfe 6:47 na safe a lokacin da wasu mabiya addinin Musulunci ke gudanar da sallar asuba a babban masallacin Juma’a da ke kan titin Okoroda a Ughelli.
Mazaunin wanda ya bayyana sunansa da Larry, ya ce da yawa daga cikin mazauna wurin sun farka daga barci sakamakon harbin bindiga da kuma ihun kukan mutanen da ke cikin masallacin.
“Sunana Larry, ni direban abin hawa ne a nan Ughelli. Ina zaune kusa da babban masallacin cikin gari, don haka a safiyar yau da misalin ƙarfe 6:45 na safe muka ji ana harbe harbe a masallacin.
“Saboda tsoro, mutane da yawa a cikin harabar gidana sun firgita kuma mun maƙale a cikin gida mun leƙo domin ganin abin da ke faruwa ta tagogin mu.
“Yayin da harbin ya ci gaba, mun ji kuka mai karfi daga wasu masu ibada a cikin masallacin,” in ji Mista Larry.
A cewarsa, bayan da maharan suka fita, da yawan mazauna garin sun yi dafifi zuwa masallacin domin ganin abin da ya faru. Ya ce mazauna yankin sun taimaka wajen kwashe waɗanda suka jikkata, ya kuma ce waɗanda suka tsira daga harin sun samu munanan raunuka.
Mista Larry ya ce wasu daga cikin masu ibadar sun shaida wa mazauna garin cewa ‘yan bindigar sun tafi da wasu ‘yan uwansu guda uku. Da aka tuntuɓi kakakin rundunar ‘yan sandan jihar Delta, DSP Bright Edafe, ya tabbatar da harin, sai dai ya ce masallata 11 ne kawai suka jikkata a harin, bai kuma tabbatar da sace wasu masu ibada ba a masallacin.
“Na kira DPO a Ughelli, ya tabbatar min da cewa mutane 11 sun jikkata a harin da aka kai a masallacin.
“Duk da haka, ‘yan sanda sun fara gudanar da bincike kan lamarin, kuma za mu sanar da ku yayin da muke kokarin bankado masu laifin.
“A yanzu, ba a kama kowa akan harinba amma ina tabbatar muku cewa za mu kamo waɗanda keda hannu a harin” in ji Mista Edafe.
An tuɓe wa ’yan sanda 5 kaki kan karɓar cin hanci
Rundunar ’yan sandan Najeriya ta tube wa wasu jami’an ta biyar kaki sakamakon zargin su da karɓar cin hancin kuɗi kimanin Naira miliyan uku.
Mataimakin Shugaban ’yan Sanda mai kula da Shiyya ta shida ta da ke Jihar Kuros Riba, Jonathan Towuru, ya sanar a Kalaba cewa ’yan sandan sun kwace kuɗin ne da bakin bindiga a hannun wani mai abin hawa.
A makon jiya ne aka zargi jami’an da ƙwayar kuɗin da bakin bindiga a hannun wani mutum da rundunar ta sakaya sunansa.
Yanzu haka waɗanda ake zargin an tuɓe masu kaki amma ana tsare da su ana bincike, da zarar an same su da laifi kotu za a turasu ta yanke masu hukuncin da ya dace.
KU KUMA KARANTA: ’Yan sanda za su tantance ’yan banga a Yobe
Mataimakin shugaban ’yan sandan ya ce waɗanda ake zargin su da karɓar cin hancin kuɗi Naira milyan uku daga wannun wani.
Ko a kwanan baya irin haka ta taba faruwa a kan babbar hanyar Kalaba zuwa Ikom inda aka kama wasu ’yan sanda kan karbar na goro.
Tafiya a kan hanyar na yawan zargin ’yan sanda da kula da shingen bincike a kan hanyar da yawan tatsar su kuɗi.
‘Yan sanda sun kama mutum 2 da ake zargin sace mahaifiyar Rarara
Rundunar ’yan sandan Jihar Katsina ta sanar da cafke wasu mutum biyu bisa zargin hannu a garkuwa da mahaifiyar fitaccen mawaƙin siyasar nan, Dauda Kahutu Rarara.
Mai magana da yawun rundunar a Katsina, ASP Abubakar Sadiq Aliyu ya ce “muna tsare da mutum biyu kan lamarin, muna ci gaba da bincike.”
Tun farko, Kwamishinan tsaro na Jihar Katsina, Nasiru Mu’azu ya ce an sace dattijuwar ce a daren Juma’a a ƙauyen Kahutu da ke Karamar Hukumar Ɗanja.
Mu’azu ya ce waɗanda suka sace matar sun yi hakan ta hanyar bi ta bayan gida, inda suka sace ta ba tare da jami’an da ke tsaron gidan sun sani ba.
Ya kuma bayyana cewa tuni aka tura jami’an tsaro waɗanda suka bazama cikin dazuka domin bin sawun ’yan bindigar.
KU KUMA KARANTA: ‘Yan bindiga sun yi garkuwa da mahaifiyar mawaƙi Rarara
Neptune Prime Hausa ta ruwaito shaidu a kauyen sun ce da misalin karfe daya na dare ne dandazon ’yan bindiga suka kutsa gidan dattijuwar suka yi awon gaba da ita.
“A kafa suka zo, ba su yi harbi ba a lokacin da suka ka yi awon gaba da ita cikin ’yan mintoci.
“Dattijuwar ba ta bijire musu ba a lokacin da suka memi ta biyo su.
“Duk da cewa ’yan bindigar sun samu wasu mutane a gidan, amma mahaifiyar Rarara kaɗai suka ɗauka.
“Babu wani yunƙuri da aka yi na tunkarar ’yan bindigar a lokacin da suke tafiya da ita saboda bindigogin da suke ɗauke da su,” in ji wani mazaunin ƙauyen na Kahutu.
Ya ce, “Watakila maharan sun bar baburansu ne daga nesa suka tako zuwa cikin ƙauyen a kafa.
“Muna rokon Allah Ya kuɓutar da ita cikin koshin lafiya domin tana taimaka mana sosai a wannan ƙauyen.
“Danta Rarara mai yawan taimakon al’umma ne, kuma ya kawo mana abubuwan ci gaba sosai a garinmu,” in ji shi.
‘Yan sanda sun kama kawali na ’yan bindiga
Daga Muhammad Kukuri
Wani wanda yake kai wa ’yan bindiga karuwai domin yin lalata da su ya shiga hannun jami’an tsaro.
’Yan sanda sun bayyana cewa kawalin ya kuma ƙware wajen yin safarar makamai ga ƙungiyar jagoran ’yan bindiga mai suna Arɗo, wanda ake nema ruwa a jallo a yankin Kagarko da ke Jihar Kaduna.
An kuma gano cewa mutumin wanda yake harkar hada-hadar tura kuɗi ta PoS, shi ke kai wa iyalan ’yan bindiga kuɗaɗe a yankin na Kagarko.
Dubun kawalin ta cika ne a yayin wani samamen haɗin gwiwa da ’yan sanda suka gudanar a yankin.
Kwamishinan ’Yan Sandan Birnin Tarayya, ya sanar ranar Talata cewa wanda ake zargin ya shaida musu cewa shi ke tsara yadda ake kai wa ’yan bindiga karuwai da miyagun ƙwayoyi da ma’aikatan lafiya a duk lokacin da suke buƙata.
KU KUMA KARANTA: Ƴan sanda a Kano sun kai mutanen da ake zargi da sayar da dala ba bisa ƙa’ida ba kotu
“Ya kuma amsa cewa yana yin dakon kuɗi tare da rabawa ga iyalan ’yan bindiga.
“A cewarsa, kuɗaɗen da ya raba wa iyalan ’yan bindiga sun haura Naira miliyan ashirin,” in ji kwamishinan ’yan sandan.
Igwe ya ce wanda ake zargin ya tabbatar musu cewa ’yan bindigar da ke ƙarƙashin Ardo sun kai 15 kowannensu da bindiga ƙirar AK-47.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano
Pingback: yan bindiga sun kashe Liman, tare da kwashe masallata da dama ana tsaka da Sallah a Katsina | Neptune Prime Hausa
Pingback: ‘Yan bindiga sun ƙona wani tsoho ɗan shekara 90 har lahira, sun kuma raunata mutum 3 a Gombe | Neptune Prime Hausa