Bayan biyan miliyan biyar, ‘yan bindiga sun saki ɗaya daga cikin masu yiwa ƙasa hidima da aka yi garkuwa da su a Zamfara

Babban daraktan hukumar yiwa ƙasa hidima (NYSC) Birgediya Janar Yushau Ahmed, ya ce an sako ɗaya daga cikin jami’an hukumar da aka yi garkuwa da su a jihar Zamfara a lokacin da suke tafiya daga garin Uyo na jihar Akwa Ibom zuwa jihar Sokoto tare da sauran bakwai da har yanzu ake hannunsu.

Da yake jawabi ga manema labarai biyo bayan wani taron masu ruwa da tsaki da aka gudanar a Abuja ranar Laraba, Darakta Janar na NYSC ya bayyana cewa an yi garkuwa da mutanen ne cikin dare.

Sakamakon haka, ya yi ƙira ga gwamnatocin jihohi da su tabbatar da tsaron lafiyar ‘yan NYSC ta hanyar bayar da umarnin kammala tafiye-tafiyensu da ƙarfe 6 na yamma.

Ya kuma buƙace su da su kwana a gidajen NYSC, cibiyoyin sojoji, ko wasu wuraren da aka keɓe, su ci gaba da tafiye-tafiye da safe.

KU KUMA KARANTA: ‘Yan Bindiga a Zamfara, sun buƙaci miliyan huɗu ga ‘yar NYSC da suka sace

Bugu da ƙari, Janar Ahmed ya bayyana cewa ana ci gaba da ƙoƙarin samar da kayayyakin jin ƙai don rage tasirin cire tallafin man fetur ga mambobin masu yiwa ƙasa hidima.

Ya yi nuni da cewa tuni jihohi daban-daban suka ɓullo da nasu hanyoyin kwantar da tarzoma domin tallafa wa matasa a wannan mawuyacin lokaci.

Wata majiya da ke kusa da dangin ɗan bautar ƙasan da aka sako ta shaida wa News Point Nigeria cewa an biya ‘yan fashin kuɗi Naira miliyan biyar (Naira miliyan biyar) ta hannun wani mai sasantawa, wanda kuma shi ne shugaban ‘yan banga a yankin.

“An yi tattaunawa tsakanin ‘yan uwa da masu garkuwa da mutane kuma an biya miliyan biyar a matsayin kuɗin fansa kafin a sako ɗan bautar ƙasan,” inji majiyar.