ABG Ya Yi Jimamin Tuna Rasuwar Janar Attahiru Yayin Da Ya Cika Shekara 1

Daga; USMAN NASIDI, Kaduna.

TSOHON dan majalisar Tarayyar Kasar Najeriya, Honarabul Shehu Usman Bawa wanda aka fi sani da ABG, wanda ya yi alhinin jimamin tuna rasuwar marigayin, ya bayyana kyawawan halayen tsohon babban hafsan sojin kasa, Laftanar Janar Ibrahim Attahiru a matsayin abun koyi ga yan baya, dukda kasancewa akalla Shekara guda kenan da ya rasu a wani hatsarin jirgin sama a Kaduna a watan Mayun 2021.

ABG a cikin wata sanarwa da ya fitar ya bayyana rasuwar Janar Attahiru a matsayin babban rashi ga Najeriya musamman a daidai lokacin da al’ummar kasar ke fama da matsalolin rashin tsaro.

Jigon jam’iyyar PDP, ya bukaci gwamnatin tarayya da gwamnatin Jihar Kaduna da su rika tunawa da Janar din da ya rasu saboda hidimar da ya yiwa Kasar da zuciya daya.

“Attahiru babban soja ne, mai kishin kasa kuma mutum ne mai kishin kasa, ya zo da buri ga Najeriya, da ya yi mana kyauta mai kyau domin yana da kwarin guiwa da duk abin da ya kamata wajen kawo karshen rashin tsaro a kasar.” Ya kara da cewa.

Ya bayyana cewa, Attahiru kwararren soja ne wanda ya mai da hankali kan yadda ake gudanar da ayyuka tare da bin umarnin har sai an aiwatar da su gaba daya.

ABG ya ce rasuwar Janar din na sojojin kasa rashi ne na kashin kai saboda kasancewar Attahiru suruki ne wanda ya tabbatar wa dangin cewa za su yi dogon tunani.

“Janar Attahiru mutum ne nagari, uba ne mai kula da ‘ya’yansa kuma mai baiwa duk wanda ya bi hanya tare da shi wajen gudanar da ayyuka na sana’a ko na kashin kai.

“Ba za a iya misalta gudummawar da ya bayar wajen bunkasa da ci gaban sojojin kasar nan ba, domin ya ba da lokaci da kuzari don tabbatar da kwarewa, inganci da kishi a tsakanin maza da hafsoshi a rundunar.

“Kasar nan za ta yi kewar sa saboda sadaukar da kai, kishin kasa da kishinsa na samar da tsaro ga rayuka da tabbatar da martabar yankin Najeriya,” in ji shi.