An Sace Sola Fanel 25 a Saman Masallacin Kanzul Mudalsam da ke Kano
Wasu da ake zargin barayi ne sun saci fanal guda 25 a saman masallacin Kanzul Mudalsam da ke unguwar Gwammaja, a kan titin hanyar Katsina a birnin Kano, lamarin da ya ƙara jefa al’ummar yankin cikin damuwa kan matsalar tsaro.
Jami’in yaɗa labarai na ƙaramar hukumar Dala, Sagiru Nazifi Yakasai, ne ya bayyana hakan a cikin wata sanarwa mai ɗauke da kwanan watan 9 ga Nuwamba, 2026, inda ya ruwaito bayanin Alh. Salisu Sabon Titi, hadimi kuma ɗan ƙungiyar Gwammaja Inafita, kan yadda satar kayayyaki da fadan daba suka addabi yankin.
Ku kuma karanta: Al’ummar Unguwar Kurna da ke Kano Sun Koka Kan Rashin Hanya
Alh. Salisu ya bayyana cewa masu aikata laifukan na satar fitilu da sauran kayayyakin masallacin, har ma suna lalata turakun da aka ɗora fitilun a kai. Ya ƙara da cewa matsalar ta kai ga hana jama’a gudanar da harkokinsu cikin walwala, inda mutane da dama ke tsoron bin hanyoyin yankin bayan ƙarfe shida na yamma. Ya kuma ce a makon da ya gabata an sace babura guda biyar tare da ƙwace wayoyin salula daga hannun mutane.
Ya yi kira ga gwamnatin Jihar Kano da hukumar da ke yaƙi da shaye-shaye da fadan daba, ƙarƙashin jagorancin Muhyi Magaji Rimin Gado, da su gaggauta ɗaukar matakan shawo kan matsalar tsaro domin kare rayuka da dukiyoyin al’ummar yankin.
