Faransa ta dakatar da aiki a tashoshin nukiliya uku saboda tsananin zafi

Gwamnatin Faransa ta dakatar da aikin tashoshin samar da wutar lantarki na nukiliya guda uku, tare da rage yawan wutar da wasu takwas ke samarwa sakamakon tsananin zafin da ƙasar ke fama da shi.

Kamfanin samar da wutar lantarki na EDF ya ce an ɗauki matakin ne domin bin dokokin kare muhalli, waɗanda suka haramta sakin ruwan da ya yi zafi daga tashoshin nukiliya zuwa koguna da tuni zafinsu ya ƙaru saboda yanayin zafi.

Ma’aikatar tattalin arzikin Faransa ta kuma ba da izinin wucin gadi ga tashar Bugey ta ci gaba da sakin ruwan sanyaya zuwa kogin Rhone har zuwa 20 ga Yuli domin tabbatar da dorewar samar da wutar lantarki.

Wannan ne karo na biyu cikin ‘yan makonnin nan da Faransa ke rage samar da wutar nukiliya saboda tsananin zafi. A halin yanzu ƙasar na fuskantar guguwar zafi ta uku tun watan Mayu, inda sama da mutane miliyan 25 suka shiga cikin yanayin da ake hasashen zafin zai kai digiri 41 na Celsius.

Tsananin zafin ya janyo rufe wasu wuraren yawon buɗe ido da wuri, tare da ƙara haɗarin gobarar daji da mace-macen nutsewa a sassa daban-daban na ƙasar.