Rundunar Sojin Najeriya ta ce ta binne sojoji biyar da ke rundunar kare shugaban ƙasa waɗanda ‘yan bindiga suka kashe a kwanakin baya.
An binne sojojin ne a maƙabartar Guards Brigade da ke Maitama , Abuja, a cewar sanarwar da kakakin rundunar, Kyaftin Godfrey Anebi Abakpa. Cikin waɗanda aka binne har da Kyaftin Attah Samuel.
“Kafin rasuwarsu, sojojin suna aiki a Bataliya ta 7 da ke barikin Lungi da ke Maitama da Bataliya ta 176 da ke Gwagwalada a birnin tarayya Abuja,” a cewar sanarwar.
Shugaban rundunar Laftanar Kanar Salim Yusuf Hassan ya bayyana Kyaftin din da kuma sauran sojojin a matsayin kwararru a fanninsu kuma sun jajirce wajen kare martabar Najeriya.
A watan jiya ne wasu ‘yan bindiga suka yi wa sojojin kwanton-bauna a yankin Bwari da ke Abuja inda suka kashe su.
