Wasu mutane sun kashe wata mata mai suna Fatima Mohammed da wani mutum da ba a san ko waye ba da aka kama da bindigu a tashar mota da ke Ibeto a ƙaramar hukumar Magama ta jihar Neja.
Kakakin rundunar ‘yan sandan jihar, DSP Wasiu Abiodun, ya tabbatar da faruwar lamarin a ranar Litinin, 9 ga watan Oktoba, 2023, a lokacin da yake gabatar da waɗanda ake zargi da aikata laifuka daban-daban a jihar.
“A ranar 01/10/2023 da misalin ƙarfe 15:30 ne aka samu labarin cewa an ga wata Fatima Mohammed da ke unguwar Jamata a Lokoja a jihar Kogi tare da wani mutum ɗaya da ba a san ko waye ba a tashar motoci da ke Ibeto, an same su da bindigar AK-47 guda ɗaya da harsashi guda goma sha huɗu da magazin guda biyu,” in ji PPRO.
“Saboda haka, jami’an ‘yan sanda da ke ofishin ‘yan sanda na Ibeto sun haɗa kai da ‘yan banga zuwa wurin. Sai dai abin takaicin shi ne, kafin zuwan tawagar ‘yan sandan, wasu gungun mutane sun kashe Fatima Mohammed da mutumin da suke tare.
Da wuƙa na kashe Kawuna Ɗanjibga, na jefa shi a rami — Mansur Haruna
Sai dai an samu nasarar gano bindigar AK-47 tare da harsashi yayin da aka kai gawarwakinsu zuwa babban asibitin Ibeto.
Zuwa haɗa wannan rahoto, jami’an tsaro na ci gaba da bincike kan lamarin.
