COPA America: Panama ta yi nasara kan Amurka

Hukumar ƙwallon ƙafa ta Amurka ta yi Allah wadai da kalaman nuna wariyar launin fata ga ‘yan wasanta a ranar Alhamis, bayan da Panama ta yi nasara a kan Amurka da ci 2-1 a gasar cin kofin Copa America.

A wani saƙo da ta wallafa a shafin X, hukumar ƙwallon ƙafa ta Amurka ta ce “Babu shakka, babu wuri a cikin wasa na irin wannan halayya ta nuna ƙiyayya da wariya.”

Sanarwar ta ƙara da cewa “Waɗannan ayyukan ba kawai ba za’a amince da su ba ne, amma kuma sun saɓa wa kimar mutuntawa da haɗa kai da muka ɗauka a matsayin hukuma.”

KU KUMA KARANTA:Manchester City ta lashe Firimiyar Ingila sau huɗu a jere

Timothy Weah, wanda baƙar fata ne, yana ɗaya daga cikin ‘yan wasan da aka ci zarafin su. An bai wa ɗan wasan gaba na Amurka jan kati kai tsaye a minti na 18 da fara wasa, saboda hannu da ya sa ya bugi ɗan wasan Panama a bayan kan sa a lokacin da ƙwallon ta fita wajen filin wasa.

Ɗan wasan Amurka Folarin Balogun ya zura ƙwallo a minti na 22 da fara wasan bayan an bai wa Weah jan kati kafin ɗan wasan Panama Blackman ya farke a minti na 26.

Fajardo ya zura ƙwallo da ta bai wa Panama nasara da ci 2-1 a minti na 83.

Weah ya fitar da wata sanarwa ta kafafan sada zumunta, inda ya bayar da haƙuri tare da neman gafarar waɗanda ya ɓata wa rai.

Yanzu haka dai Amurka, wacce ita ce ke karɓar baƙuncin gasar cin kofin na Copa America, muddin tana son zuwa zagaye na gaba to dole ne ta yi nasara a wasanta da Uruguay da zura ƙwallaye wanda ko da Panama ta yi nasara kan Bolivia za ta samu tsallake wa.

Yalon kati ya hana Slovenia hawa mataki na biyu a guruf ɗin gasar Euro 2024

Yayin da ake kammala zagayen matakin guruf-guruf a gasar Euro 2024 da ke gudana a ƙasar Jamus, a Rukunin C, ƙasashen Slovenia da Denmark sun yi kankankan a yawan maki da yawan ƙwallaye, inda duka suka ƙare da maki uku.

A rukunin nasu, Ingila ce ta zo ta farko da maki 5 bayan ta ci wasa ɗaya kuma ta yi canjaras sau biyu. Sai Serbia da ta zo ta ƙarshe da maki biyu, bayan ta yi canjaras sau biyu da rashin nasara sau ɗaya.

Sai dai ba a iya tantance wace ƙasa ce ta biyu ba a rukunin, kasancewar Denmark da Slovenia kowannensu yana da maki uku, bayan yin canjaras sau uku. Ko da aka duba yawan ƙwallayen da kowa ya ci da waɗanda aka ci shi, ƙasashen sun kuma yin arba.

Wannan ne ya tilasta wa hukumar ƙwallon ƙafa ta Turai, UEFA yin amfani da wata dokar da ba a saba jin ta ba, don fayyace waye yake mataki na biyu, don a san da wa zai kara a matakin gaba na ‘yan-16.

KU KUMA KARANTA: Manchester City ta lashe Firimiyar Ingila sau huɗu a jere

Sakamakon haka ne, aka duba wace tawaga ce ta fi ladabi, inda aka duba yawan katin gargaɗi da aka bai wa kowace ƙasa cikin wasanni uku da suka buga. Sai dai an kuma samun yawan katin nasu shi ma daidai ne.

A nan ne UEFA ta duba cewa cikin yalon katunan da aka bai wa tawagar Slovenia, akwai ɗaya da aka bai wa mataimakin kocinsu, Novakovic Milivoje, wanda ya sa aka yanke hukuncin cewa hakan ya nuna Denmark sun fi Slovenia nuna ladabi.

Wannan ne ya ba wa ƙasar Denmark dama ta samu haye wa gaban Slovenia inda ta zamo a mataki na biyu a rukunin, kuma ta tsallaka zuwa matakin siri-ɗaya-ƙwale kai-tsaye.

Amma kuma duk da cewa Slovenia ta ƙare a mataki na uku, ta samu cancantar wucewa matakin na gaba, wanda shi ne karon farko da ta kai irin wannan mataki a wata babbar gasa, a tarihin ƙasar.

Mourinho ya sanya hannu kan kwantiragi da Fenerbahçe

Ƙungiyar Fenerbahçe ta Turkiyya ta sanya hannu kan yarjejeniya da koci ɗan asalin Portugal, Jose Mourinho.

Shugabannin ƙungiyar Fenerbahçe ta Turkiyya sun cim ma yarjejeniyar aiki ta shekara biyu da Jose Mourinho.

Jagororin kulob ɗin da ke buga wasa a gasar Super Lig ta Turkiyya, Ali Koç da Mario Branco, sun gudanar da tattaunawar da kocin ɗan asalin Portugal.

Sun cim ma kyakkyawar matsaya a tattaunawarsu da Mourinho don ya zama daraktan wasanni na ƙungiyar.

Za a rattaba hannu a hukumance bayan taron ido-da-ido tsakanin Mourinho da shugabansu Ali Koç a ƙarshen mako.

KU KUMA KARANTA: Jose Mourinho ya nuna sabon tattoo na bikin murnar sharewarsa ta musamman ta Turai

Ƙungiyar Fenerbahçe na ci gaba da shirye-shiryen share fagen kakar baɗi, bayan ta kammala kakar bana a mataki na biyu a gasar Super League da maki 99.

Shugaban hukumar ƙungiyar, Ali Koç, wanda yake takarar shugabancin ƙungiyar a Taron Babban Zauren ƙungiyar, ba zai ci gaba ba tare da İsmail Kartal a matsayin kocin babbar tawagar ta A a sabuwar kaka.

Shugaba Ali Koç da Daraktan Wasanni na ƙungiyar Mario Branco, sun sanar da İsmail Kartal game da hukunci kan wannan batun. Kulob ɗin zai sanar a hukumance cikin kwana ɗaya zuwa biyu masu zuwa.

A wajen shugaban ƙungiyar Ali Koç, da ma ɗan takarar shugabanci Aziz Yıldırım, Jose Mourinho ne ke kan gaba a jerin waɗanda ake son ɗauko wa don jagorantar Fenerbahçe.

Mourinho ya bibiyi wasan ƙungiyar na baya-bayan nan a gasar, ya kuma ɗauki bayanai game da yanayin tawagar.

Kuma rahotanni sun nuna cewa koci ya samu bayanai game da kulob ɗin da birnin daga wajen ‘yan wasan da suka taɓa buga wasa a Fenerbahçe.