Daga Saleh INUWA, KANO
A karon farko tun bayan rabuwar auren Sani Danja da Mansurah Isah, yau kusan shekara 1 da rabi kenan, Mansurah Isah ta fito ta yi magana a game da mutuwar auren na su.
A wata tattaunawa da Mujallar fim tayi da ita a ‘Yan ƙwanakinnan, Mansurah Isah ta bayyana cewar, tun bayan rabuwar su da Sani Danja ta ke ganin labarai Kala Kala a game da rabuwar ta su, wasu su na zagi, wasu su na nuna ɓacin ran su a game da rabuwar da suka yi, wadda Kuma komai ƙaddara ce daga Allah.
Ta ce “Ko da farko ma abin da ya sa ta sanar da rabuwar su a Soshiyal Media, ta yi Hakan ne domin a matsayin ta na Fitacciya kada a ganta a wani waje ko ta tsaya da wani a rinƙa yi mata kallon ta na yin wasa da aure, don haka ta sanar da duniya.
Ta Ƙara da cewar “Na san mutane su na sha’awar zaman auren mu har ma a na kafaisali da mu a cikin ‘Yan fim da muka shafe tsawon lokaci mu na zaman aure, don haka rabuwar ba ta yi wa kowa daxi ba. To Amma mutane su sani duk rashin jin dadin su mu mun fi su rashin jin dadin hakan saboda mu ne mu ke zaune da juna kuma muka rabu.
Mutane su sani ba mun yi aure ba ne don mu rabu. Domin idan mun yi ne don mu rabu, babu yadda za a yi mu shafe shekaru 14 muna tare, don haka Allah Ne ya kawo ƙarshen zaman mu.
Kuma duk son mu da zama tare idan aka kawo wajen da zama ya haramta, to dole a yi hakuri da juna, don haka kamar yadda mutane su ke nuna mana so da ƙauna, kuma su ke yi mana fatan alheri, mu ma muna yi musu fatan alheri, kuma ina ba su hakuri da ƙaunar da su ke nuna mana. Masu zagi kuma su je su yi ta yi ba za mu Hana su ba.
