Kotu ta rushe shugabancin David Mark na ADC, ta soke takarar Atiku a zaɓen 2027
Wata Babbar Kotun Tarayya da ke zamanta a Abuja, a yau Alhamis, ta soke dukkan matakan da jam’iyyar African Democratic Congress (ADC) ta bi wajen fitar da tsohon mataimakin shugaban ƙasa, Atiku Abubakar, a matsayin ɗan takararta a zaɓen 2027.
Mai shari’a Peter Lifu, wanda ya yanke hukuncin, ya kuma soke naɗin tsohon shugaban Majalisar Dattawa, David Mark, da Rauf Aregbesola da wasu a matsayin shugabannin jam’iyyar na ƙasa.
Alƙalin ya kuma bayyana cewa dukkan ’yan takarar da jam’iyyar ta tsayar a zaɓen 2027 sun rasa takararsu, saboda an fitar da su ne ƙarƙashin shugabancin jam’iyyar da bai bi ƙa’ida da doka ba.
Ku kuma karanta: Zaɓen 2027: Ba za mu janye wa Atiku ba – Kwankwaso
Mai shari’a Lifu ya amince da ƙarar da Nafiu Bala Gombe, mataimakin shugaban jam’iyyar na ƙasa, ya shigar, inda ya ƙalubalanci yadda David Mark da Rauf Aregbesola suka zama shugabannin ADC, yana mai cewa hakan ya saɓa wa doka.
Alƙalin ya bayyana cewa dukkan matakan da shugabancin David Mark ya ɗauka da sunan jam’iyyar ADC ba su halatta ba, don haka kotun ta soke su.
