Tsohon gwamnan Delta, Emmanuel Uduaghan, ya rasu
Tsohon gwamnan jihar Delta, Emmanuel Eweta Uduaghan, ya rasu yana da shekara 71 a ranar Litinin, 19 ga Oktoba, 2026, bayan fama da rashin lafiya na kankanin lokaci.
Jaridar TheCable ta rawaito cewa, iyalan mamacin ne suka sanar da rasuwarsa cikin wata sanarwa da Toju Anire Uduaghan ya sanya wa hannu.
Sanarwar ta bayyana cewa Uduaghan ya rasu da safiyar ranar Litinin, kwanaki uku kafin cikarsa shekara 72.
Marigayin ya yi gwamna a jihar Delta na tsawon wa’adi biyu, daga shekarar 2007 zuwa 2015.
Kafin zama gwamna, Uduaghan ya riƙe muƙamin kwamishinan lafiya na jihar daga 1999 zuwa 2003, sannan ya zama sakataren gwamnatin jihar daga 2003 zuwa 2007.
Iyalan mamacin sun bayyana alhininsu kan rasuwarsa, inda suka ce ya kasance uba, ɗan’uwa kuma dattijo mai daraja wanda rayuwarsa da hidimarsa suka shafi mutane da dama a jihar Delta da Najeriya baki ɗaya.
