Kannywood
Za a ƙaddamar da sabuwar ƙungiyar matan Kannywood ta AKAFA gobe asbar
A yanzu haka, shirye-shirye sun kammala domin gudanar da taron ƙaddamar da sabuwar ƙungiyar matan Kannywood mai suna ‘Association of Kannywood Female Artistes’ (AKAFA) wanda za a yi a gobe Asabar, 23 ga Yuli, 2022.
Za a yi taron a ɗakin taro na ‘Meenah Events Centre’ da ke Kano.
Shugabar ƙungiyar ta ƙasa, Hajiya Rashida Adamu Abdullahi Maisa’a, ita ce ta sanar da hakan a lokacin tattaunawar da ta yi da mujallar Fim a game da taron.
Hajiya Rashida ta yi bayanin cewa: “A gaskiya, mu a yanzu mun kammala shirin taron, ranar kawai mu ke jira domin gudanar da shi. Kuma wannan taron zai bai wa kowa mamaki, domin mun gayyaci manyan mutane na masana’antar Kannywood da malamai da ‘yan siyasa da sauran jama’a domin su zo su ga abin da ‘yan fim su ke yi na alheri, ba kamar yadda a ke ba su labarin mu ba.
“Domin kuwa mu ‘yan fim mutane ne masu abubuwan alheri, to sai dai ba a faɗa, sai ya zama abin da wasu kaɗan daga cikin mu su ke yi shi ne ya ke zama labari a wajen mutane. To mutane za su zo su ga aikin mu na alheri.”
A game da halartar ‘yan fim a taron kuwa, Rashida ta ce: “Ba mu ɗauke wa duk wata jaruma ba domin taron na duk matan da su ke yin fim ne, tun daga farkon Kannywood har zuwa wannan lokacin. Don haka masu ‘ya’ya da jikoki duk kowa ya zo da su, don taron na sada zumunci ne a tsakanin ‘yan fim da ‘ya’yan su, wanda kuma mu na sa ran abin ya ɗore har zuwa jikokin mu, don ba ma fatan abin ya tsaya a iya kan mu.”
Ta ci gaba da cewa: “Ina tabbatar wa da mutane wannan taron ya bambanta da duk wani taro da aka ta yi a cikin masana’antar Kannywood, domin zan iya faɗa maka cewa ba a taɓa yin taro irin wanda za mu yi ba saboda harkar fim ta mata ce. Don haka a yanzu mun haɗu jaruman mu da furodusas ɗin mu da mawaƙan mu da ma duk wata mace da ta ke yin aiki a cikin masana’antar, mun dunƙule za mu yi tafiya tare domin neman ‘yancin kan mu.
“Don haka daga yanzu mu na da tsarin da ba za mu rinƙa zama kara-zube ba kamar yadda mu ke yi a baya. Don za mu rinƙa taimakon junan mu; ko mace ba ta da lafiya, ko ta samu kan ta cikin matsala, za mu shiga mu fita domin ganin ta samu ‘yanci.
“Kuma daga ‘yanzu duk jarumar da ta yi aiki aka hana ta kuɗin ta za mu shiga cikin maganar don ganin a karɓar mata haƙƙin ta.”
Daga ƙarshe, shugabar ta ƙungiyar AKAFA ta yi fatan za su yi taron lafiya su gama lafiya.
Bayan ce-ce-ku-ce, Hukumar Hisbah ta jihar Kano ta sake zama da daraktoci da furdusoshi da jarumai da sauran masu ruwa da tsaki a Kannywood don tsaftace harkar fim da nufin kau da ayyukan baɗala a jihar.
A jawabansu daban-daban, Shugaban Ƙungiyar MOPPAN ta Ƙasa Dokta Ahmad Sarari da takwaransa na Jihar Kano Ado Ahmad Gidan Dabino da Shugaban Ƙungiyar Jarumai Alasan Kwalle sun nuna jin daɗinsu game da taron inda suka sha alwashin ba wa Hisbah goyon baya tare da alkawarin cewa nan gaba za a samu gyara a harkar fim ɗin.
Wannan shi ya kawo ƙarshen ce-ce ku-cen da aka yi ta yi game da ganawar Hukumar da ’yan fim na farko, wanda mafi yawansu suka ƙaurace wa bisa hujjar cewa Hisbar ba ta bi hanyar da ta dace wajen gayyatar su ba.
KU KUMA KARANTA: ’Yan Kannywood da dama sun ƙaurace wa taron da Hisbah ta gayyata a Kano
Hukumar ta sake miƙa musu goron gayyata a karo na biyu wanda suka amsa a ƙarƙashin jagorancin ɗan gidansu wato Shugaban Hukumar Tace Finafinai da Dab’i ta Jihar Kano Abba Almustapha.
Kwamanda-Janar na Hukumar Hisbah Shaikh Aminu Ibrahim Daurawa ya bayyana cewa ƙorafe-ƙorafe da suke yawan samu daga Kanawa da sauran sassan Najeriya kan yadda ’yan fim ke nuna abubuwan da suka saɓa wa addinin Musulunci da al’adun Hausawa a cikin finafinansu ya sa suka ga dacewar zama da masu ruwa da tsaki a harkar fim don laluɓo hanyoyin kawo gyara a cikin harkar.
“Ita Hukumar Hisbah an kafa ta ne don ta saita al’umma a kan koyarwar addinin tare da yi musu katanga daga aikata munanan ayyuka.
“Muna so a laluɓo hanyoyin da za a rage nuna abubuwa da suke na tir tare da ci gaba da nuna abubuwa da za su dabbaka addinin da kyawawan koyarwar al’adun Hausawa a harkar fim,” in ji Daurawa.
A nasa ɓangaren, Abba Almustapha ya bayyana cewa tuni ’yan fim din suka amince za su zama masu bin doka.
Abba Almustapha ya jaddada cewa nan ba da dadewa ba hukumomin biyu za su shirya taron ƙara wa juna sani da ’yayan Kannywood don ilimintar da su kan abin da ya shafi fim ta fuskar addinin Musulunci inda za a gayyato fitattun malaman Musulunci don tattauna tare da laluɓo hanyoyin da za a kai harkar fim ɗin ga tudun mun tsira.
Kamar yadda Neptune Hausa ta kawo labarin cewa shahararren ɗan wasan Nijeriya Ahmed Musa MON ya yi alƙawarin sayawa Baba Karkuzu gida a yau Talata, alƙawari ya cika.
Alhamdulillah an sayi gida an kuma karɓi takardun gidan.
Kamar yadda kuke gani a hoto Baba Karkuzu ne riƙe da Jessy ɗin Ahmad Musa tare da takardan gidan shi cikin farin ciki da godiyar Allah (T).
Jarumin Kannywood, Karkuzu ya makance, yana kukan neman taimako
Ga waɗanda suka taimaka, Baba yace a isar masa da godiya a gare su, Ubangiji Allah ya sakawa kowa da alkhairi, Allah ya biyawa kowa buƙatar shi, wanda suka taimaka kuɗi da wanda suka taimaka da addu’a.
Dukkan mu Allah ya sakawa kowa da gidan Aljannah, Allah ya dube mu lokacin da muke cikin tsanani, Allah ya suturta mu da suturar shi mara yankewa, Allah ya rufa mana asirin mu. Ameen ya Allah.
Fitaccen jarumin Kannywood, Abdullahi Shuaibu wanda aka fi sani da Karkuzu ya makance kuma yana fama da rashin lafiya.
Jarumin, wanda aka yaɗa bidiyonsa a shafukan sada zumunta, ya nemi taimakon kuɗi, inda ya bayyana cewa ya yi rashin lafiya tun watan Disambar 2020.
Shuaibu ya fara fitowa a masana’antar nishaɗantarwa ta Hausa a shekarun 1980 tare da shahararriyar wasan kwaikwayo mai suna Karkuzu na Bodara wanda ya sanya ake masa laƙabi da Karkuzu.
A zantawarsa da wannan jarida bayan faifan bidiyo, Karkuzu ya ce, “Yanzu na makance kamar yadda nake magana da ku. Ina matuƙar buƙatar taimakon kuɗi. Ba ni da abincin da zan ci da ciyar da iyalina.
KU KUMA KARANTA: Yadda mutuwar Alhaji Mala na shirin ‘Daɗin Kowa’ ta jijjiga Kannywood
“Gidan da nake zaune yanzu za a sayar. Idan sun sayar da wannan gidan, ban san inda zan dosa ba. Don haka ne nake neman taimako daga ‘yan Najeriya da su kawo min agaji.
A ƙalla ‘yan Najeriya su taimaka min sayan wannan gidan da nake zaune.”
Dangane da makanta, ya ce, “An min aiki sau biyu, amma a ƙarshe likitoci sun ce glaucoma ce, kuma ba zan sake gani ba. Na yarda da hakan a matsayin makoma ta. Amma ya kamata ‘yan Nijeriya su taimake ni. Kawo min gidan nan, da abinci.”
Masana’antar Kannywood na da ƙungiyoyi da dama, amma akwai zargin cewa ‘yan wasan kwaikwayo da dama ba sa kula da su idan ba su da lafiya kuma suna buƙatar taimako.
Zuwa haɗa wannan rahoto, ɗan wasan ƙwallon ƙafa na Najeriya Ahmad Musa ya ba shi kyautar naira dubu ɗari biyar, sannan ya ce a nemo gida na naira miliyan biyar zai saya masa.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano