Daga Sani Gazas Chinade, Damaturu
Dakarun Operation Haɗin Kai (OPHK) sun yi nasarar kashe mayakan Boko Haram da na ISWAP masu yawan gaske tare da yin raga-raga da sansanonin su 25 a wani gagarumin farmaki da suka ɗauki tsawon mako guda ana kai wa ‘yan ta’addan a jihar Borno.
Rahotanni sun ce majiyoyin leƙen asiri sun shaidawa ƙwararre kan masu tada ƙayar baya kuma mai sharhi kan harkokin tsaro a yankin tafkin Chadi, Zagazola Makama, a jiya, cewa hare-haren ta ƙasa da na sama, wanda aka fara a ranar 7 ga watan Janairu, 2024, a matsayin wani ɓangare na Operation Desert Sanity III, shi ma ya haifar da samun wannan nasara a fagen yaƙi a dajin Sambisa da Timbuktu Triangle.
Majiyar ta bayyana cewa, a wani ƙazamin farmaƙin da sojojin na Birged 21 suka kai a garin Bama, sun yi arangama da ‘yan ta’adda a Ukuba da ke Sambisa, inda suka yi raga-raga da su Sakamakon arangamar dai an ce sun kashe mayaƙan ISWAP da dama nan ta ke, lamarin da ya sa sauran ‘yan ta’addan tserewa a yayin wannan arangamar, wata mota ɗauke da babbar bindigar harbe jirgin Saman yaƙi guda ɗaya mallakar ‘yan ta’addan ɗauke da alburusai ta tarwatse.
KU KUMA KARANTA: Mutane biyu sun mutu, takwas sun jikkata sakamakon fashewar bam a jihar Borno
Sojojin sun kuma ƙwato makamai da kayan yaƙi iri-iri a ci gaba da kai hare-hare a cikin dajin na Sambisa, sojojin sun kuma fatattaki ‘yan Ta’addan da ke maƙale a Garin Abu Umaru, New/Old Mjimia, Garin Munzo, Alafa 1 da Alafa 2.
Sojojin sun kuma kama wani da ake zargin Amir na Garin Munzo ne da wasu mayaƙa guda biyar tare da kashe su, yayin da aka gano sabbin sansanoni tare da lalata su.
Majiyar ta kuma bayyana irin jarumtaka da jajircewar da dakarun Sojan suka nuna wanda ya taimaka matuƙa wajen samun damar fatattakar ‘yan ta’adda daga wurare da dama.
A wata arangama kuma, dakarun bataliya ta 159 da ta musamman ta 199 tare da haɗin gwiwar rundunar haɗin guiwa ta Civilian Task Force (CJTF) sun fatattaki ‘yan ta’adda a garuruwan Balar, Yaro Bulamari, Yaro Goni Krumidi, Yaro Lawanti da kuma Yaro Umaradi.
Wata Mai kama da haka kuma A jihar Yobe, sojojin na bataliya ta 27 Task Force Brigade sun ci gaba da kai farmaki tare da fatattakar ‘yan Ta’addan ISWAP da na Boko Haram a Wasu yankuna da ke arewaci da kudancin Jihar, Sun kuma Wasu abujuwan fashewa tare da tayar da su da zimmar lalata su yayin da ‘Yan ta’addan suka tsere daga wuraren inda suka yi watsi da buhunan hatsi iri-iri 67 a wani ma’ajiyar karkashin kasa, tare da harsasai.
Bugu da ƙari, sojojin sun yi musu kwanton ɓauna tare da kashe ‘yan ta’addar ISWAP biyu a Katarko da ke kan hanyar zuwa Yadin Buni da ke kudu da garin Damaturu fadar Jihar tare da kwato bindigogi kira AK-47 guda biyu.
