Kannywood
Sai ka cika waɗannan sharuɗɗa kafin ka tunkareni da aure – Fati Washa
Kyakyawar Jarumar Kannywood, Fati Abdullahi Washa ta cikin shirin wasan Hausa me dogon Zango, “Labarina” ta bayyana cewa ta shirya yin aure, amma ko wane mijin ya zama dole ya cika wasu sharuɗɗa kafin ta saurare shi.
Fati Washa mai shekaru 30, haifaffiyar Bauchi ta yi makarantar firamare da sakandare a Bauchi, daga baya ta samu shaidar NCE a Kwalejin Ilimi ta Tarayya da ke Kano. Daga nan ta shiga Kannywood a matsayin jarumar me tallafawa na tsawon shekaru, inda ta yi fice a fina-finan hausa da dama, kafin ta kasance cikin jarumai masu tsada. Yanzu dai ta zama babbar jaruma me daraja, furodusoshi da daraktoci a kodayaushe suna sha’awar saka doguwar jarumar ‘yar kudancin Kaduna, a finafinansu.
Neptune Prime ta jiyo cewa yanzu tana harka tare da manyan mutane da manyan ‘yan siyasa da ‘yan kasuwa, ta sami albarkatu masu yawa, daga gwala-gwalai, zuwa motoci, kuma ta gina gida ga iyayenta a cikin unguwar Kinkinau.
Fati Washa, wacce har yanzu ba ta da aure kuma a kasuwa take, ta fitar da sanarwa ta kafafen sada zumunta na zamani, cewa yanzu takai inda takeso takai a rayuwa, kuma a shirye take ta yi aure idan ta samu wanda ya cika sharuɗɗanta, wato: dole ne ya kasance attajiri, dole ne ya kasance dogo, baƙi kuma kyakkyawa.
Sannan dole ya kasance ya iya karanta alqur’ani, kuma ya haddace shi. Dole ne ya kasance mai kulawa da iya soyayya, kuma dole ne ya kasance yana mata soyayyar tsakani da Allah, kuma a karshe ya zama saurayi marar aure, kuma ba zai taɓa auren mace ta biyu ba.
Neptune Prime ta gano cewa tun bayan da ta fito da waɗannan sharudda, hakan ya rika jawo mata munanan martani a kafafen yaɗa labarai, inda wasu ke zarginta da son kai, a matsayin ta na ‘yar wasan hausa, mace mara daraja, da kuma rashin ilmin Addini dana boko. Wasu kuma na cewa aure yana buƙatar addu’a ne, ba sharaɗi mai wahala ba.
Bayan ce-ce-ku-ce, Hukumar Hisbah ta jihar Kano ta sake zama da daraktoci da furdusoshi da jarumai da sauran masu ruwa da tsaki a Kannywood don tsaftace harkar fim da nufin kau da ayyukan baɗala a jihar.
A jawabansu daban-daban, Shugaban Ƙungiyar MOPPAN ta Ƙasa Dokta Ahmad Sarari da takwaransa na Jihar Kano Ado Ahmad Gidan Dabino da Shugaban Ƙungiyar Jarumai Alasan Kwalle sun nuna jin daɗinsu game da taron inda suka sha alwashin ba wa Hisbah goyon baya tare da alkawarin cewa nan gaba za a samu gyara a harkar fim ɗin.
Wannan shi ya kawo ƙarshen ce-ce ku-cen da aka yi ta yi game da ganawar Hukumar da ’yan fim na farko, wanda mafi yawansu suka ƙaurace wa bisa hujjar cewa Hisbar ba ta bi hanyar da ta dace wajen gayyatar su ba.
KU KUMA KARANTA: ’Yan Kannywood da dama sun ƙaurace wa taron da Hisbah ta gayyata a Kano
Hukumar ta sake miƙa musu goron gayyata a karo na biyu wanda suka amsa a ƙarƙashin jagorancin ɗan gidansu wato Shugaban Hukumar Tace Finafinai da Dab’i ta Jihar Kano Abba Almustapha.
Kwamanda-Janar na Hukumar Hisbah Shaikh Aminu Ibrahim Daurawa ya bayyana cewa ƙorafe-ƙorafe da suke yawan samu daga Kanawa da sauran sassan Najeriya kan yadda ’yan fim ke nuna abubuwan da suka saɓa wa addinin Musulunci da al’adun Hausawa a cikin finafinansu ya sa suka ga dacewar zama da masu ruwa da tsaki a harkar fim don laluɓo hanyoyin kawo gyara a cikin harkar.
“Ita Hukumar Hisbah an kafa ta ne don ta saita al’umma a kan koyarwar addinin tare da yi musu katanga daga aikata munanan ayyuka.
“Muna so a laluɓo hanyoyin da za a rage nuna abubuwa da suke na tir tare da ci gaba da nuna abubuwa da za su dabbaka addinin da kyawawan koyarwar al’adun Hausawa a harkar fim,” in ji Daurawa.
A nasa ɓangaren, Abba Almustapha ya bayyana cewa tuni ’yan fim din suka amince za su zama masu bin doka.
Abba Almustapha ya jaddada cewa nan ba da dadewa ba hukumomin biyu za su shirya taron ƙara wa juna sani da ’yayan Kannywood don ilimintar da su kan abin da ya shafi fim ta fuskar addinin Musulunci inda za a gayyato fitattun malaman Musulunci don tattauna tare da laluɓo hanyoyin da za a kai harkar fim ɗin ga tudun mun tsira.
Kamar yadda Neptune Hausa ta kawo labarin cewa shahararren ɗan wasan Nijeriya Ahmed Musa MON ya yi alƙawarin sayawa Baba Karkuzu gida a yau Talata, alƙawari ya cika.
Alhamdulillah an sayi gida an kuma karɓi takardun gidan.
Kamar yadda kuke gani a hoto Baba Karkuzu ne riƙe da Jessy ɗin Ahmad Musa tare da takardan gidan shi cikin farin ciki da godiyar Allah (T).
Jarumin Kannywood, Karkuzu ya makance, yana kukan neman taimako
Ga waɗanda suka taimaka, Baba yace a isar masa da godiya a gare su, Ubangiji Allah ya sakawa kowa da alkhairi, Allah ya biyawa kowa buƙatar shi, wanda suka taimaka kuɗi da wanda suka taimaka da addu’a.
Dukkan mu Allah ya sakawa kowa da gidan Aljannah, Allah ya dube mu lokacin da muke cikin tsanani, Allah ya suturta mu da suturar shi mara yankewa, Allah ya rufa mana asirin mu. Ameen ya Allah.
Fitaccen jarumin Kannywood, Abdullahi Shuaibu wanda aka fi sani da Karkuzu ya makance kuma yana fama da rashin lafiya.
Jarumin, wanda aka yaɗa bidiyonsa a shafukan sada zumunta, ya nemi taimakon kuɗi, inda ya bayyana cewa ya yi rashin lafiya tun watan Disambar 2020.
Shuaibu ya fara fitowa a masana’antar nishaɗantarwa ta Hausa a shekarun 1980 tare da shahararriyar wasan kwaikwayo mai suna Karkuzu na Bodara wanda ya sanya ake masa laƙabi da Karkuzu.
A zantawarsa da wannan jarida bayan faifan bidiyo, Karkuzu ya ce, “Yanzu na makance kamar yadda nake magana da ku. Ina matuƙar buƙatar taimakon kuɗi. Ba ni da abincin da zan ci da ciyar da iyalina.
KU KUMA KARANTA: Yadda mutuwar Alhaji Mala na shirin ‘Daɗin Kowa’ ta jijjiga Kannywood
“Gidan da nake zaune yanzu za a sayar. Idan sun sayar da wannan gidan, ban san inda zan dosa ba. Don haka ne nake neman taimako daga ‘yan Najeriya da su kawo min agaji.
A ƙalla ‘yan Najeriya su taimaka min sayan wannan gidan da nake zaune.”
Dangane da makanta, ya ce, “An min aiki sau biyu, amma a ƙarshe likitoci sun ce glaucoma ce, kuma ba zan sake gani ba. Na yarda da hakan a matsayin makoma ta. Amma ya kamata ‘yan Nijeriya su taimake ni. Kawo min gidan nan, da abinci.”
Masana’antar Kannywood na da ƙungiyoyi da dama, amma akwai zargin cewa ‘yan wasan kwaikwayo da dama ba sa kula da su idan ba su da lafiya kuma suna buƙatar taimako.
Zuwa haɗa wannan rahoto, ɗan wasan ƙwallon ƙafa na Najeriya Ahmad Musa ya ba shi kyautar naira dubu ɗari biyar, sannan ya ce a nemo gida na naira miliyan biyar zai saya masa.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano