Mutum 2 sun mutu, an ceto 4, sakamakon ruftawar gini a Abuja

Hukumar bayar da agajin gaggawa na babban birnin tarayya Abuja, FEMA, ta tabbatar da mutuwar mutane biyu tare da ceto wasu mutane huɗu a wata katanga da ta rufta a unguwar Ademola Adetokunbo Crescent dake Wuse II a Abuja.

Babban daraktan hukumar ta FEMA, Dakta Abbas Idriss ne ya tabbatar da hakan a wata hira da kamfanin dillancin labarai na Najeriya a Abuja ranar Laraba.

KU KUMA KARANTA: Gini ya ruguje, ya rufta kan mutane a hanyar Beirut Kano

Mista Idriss ya ce: “Da misalin ƙarfe 10 na safe zuwa ƙarfe 11 na safe, mun samu ƙiran waya cewa an samu rugujewar gini kusa da bankin United Bank for Africa (UBA) a Ademola Adetokunbo Crescent, Wuse II.

“Da sauri muka kunna motocin tawagar ceton mu zuwa wurin kuma da isarsu sai suka ga bangon gini ne ya faɗo kan masu sana’a da ke aiki a kewayen yankin.

Ya zuwa yanzu an cire mutane shida daga cikin waɗanda ginin ya rufta akansu, sannan kuma biyu sun mutu yayin da huɗu ke kwance a asibiti a halin yanzu. “Gini ne da ake ginawa kuma sun ci ginin da ke kusa da su saboda ba gininsu ne ya faɗi ba, ginin maƙwabta ne ya faɗi a kansu.”

Babban daraktan ya ce hukumar ta daɗe tana wayar da kan mazauna babban birnin tarayya Abuja kan buƙatar bin tsarin amincewar gine-gine na tsarin Abuja.

Ya yi ƙira ga masu ruwa da tsakin da ke da alhakin ba da tsarin amincewar gine-gine a cikin babban birnin tarayya, kamar Sashen Kula da Raya Ƙasa, Sashen Ayyukan Injiniya da sauran hukumomi, da su tabbatar sun ba da sahihin tsari tare da sanya ido kan gine-gine a duk wurare.

“Hakan ne kawai don kiyaye lamarin saboda amincewar ya kamata ya kasance cikin matakai kamar yadda kuka ba da izini a kashi na ɗaya, idan sun yi daidai da ƙayyadaddun bayanai yanzu kun ba su izini na kashi na biyu kamar yadda ya kamata ya kasance.

“Amma idan kun ba da izinin farko don kawai ku fara ginin za su iya ginawa da duk abin da za su iya. Koyaya, a cikin wannan yanayin kamar yadda na faɗa a baya, ba muna magana ne game da amfani da kayan ƙasa ba.

“Saboda sun faɗaɗa gininsu da cin jikin ginin unguwar, wanda a ƙarshe ya ruguje kan masu sana’ar,” in ji babban jami’in FEMA.