Da ilimi ake samun kowace irin nasara a rayuwa – Dauda Lawal

Daga Idris UMAR, Zariya

Gwamna Dauda Lawal ya halarci taron yaye ɗalibai karo na uku da na huɗu na Jami’ar tarayya, wanda ya gudana a filin taro na Jami’ar da ke Gusau a cikin satin da ya gabata

Mai magana da yawun gwamnan, Sulaiman Bala Idris ne ya bayyana haka a cikin wata sanarwa da ya fitar ranar Litinin a Gusau cewa, Gwamna Lawal ya shelanta bayar da gurbin karatu ga duk wanda ya zo na ɗaya a Jami’ar.

Cikin jawabinsa a wurin taron, Gwamnan ya yaba wa shugabannin Jami’ar game da yadda suka iya ririta ɗan abin da suke da shi, duk da ɗimbin ƙalubalen da suke fuskanta.

Ya ce, “Ina matuƙar farin cikin kasancewa da ku yau a wannan bikin yaye ɗalibai karo na uku da na huɗu a wannan jajirtacciyar Jami’a, Jami’ar gwamnatin tarayya ta Gusau.

Ina taya jami’ar nan murnar samun wannan nasara, duk kuwa da matsalolin da suke fuskanta tun lokacin da aka kafa ta. Ina kuma yaba wa iyaye da ɗalibai bisa sadaukarwar da suka nuna har zuwa wannan matsayi.

Muna sa ran samun makoma mai kyau kuma mai albarka duk da tarin ƙalubalen da muke fuskanta a matsayinmu na jiha kuma al’umma.

Muna yin addu’a kuma muna aiki ba dare ba rana don samar da makoma mai kyau. Duk waɗannan matsaloli za su wuce da izinin Allah Maɗaukakin Sarki.”

Gwamnan ya yi ƙarin haske kan ƙoƙarin gwamnatinsa na gyara harkar ilimi a Jihar Zamfara bayan kafa dokar ta-ɓaci a bara.

“A matsayinmu na gwamnati, mun ƙuduri aniyar ilimantar da duk ’ya’yan Zamfara. Ilimi shi ne ginshiƙin da ke haskaka ruyuwar ɗan adam.

“Mun ware maƙudan kuɗaɗe ga ɓangaren ilimi a cikin kasafin kuɗinmu na 2024 kuma muna fatan za mu kai ga babban matsayi a 2025, 2026, da 2027. Muna fatan cimma kashi 25 zuwa 30 na haɓaka tsarin ilimi.

Tare da samar da ingantaccen tsari a fannin da sarrafa albarkatun da ya ƙunsa, muna da ƙwarin gwiwar cewa za mu farfaɗo da ababen more rayuwa, ɗaukar ƙwararrun malamai, horarwa da sake horar da waɗanda ake da su.

“Za kuma mu ƙara yawan masu karatu a makarantun firamare da na gaba da firamare ta hanyar wayar da kan jama’a da samar da ingantattun wuraren koyo da koyarwa. Ilimi kyauta ne, kuma muna fatan ya zama wajibi ga kowa.

“Mun kuma yi wa manyan makarantunmu da ke jihar kason kuɗi mai yawa don fara aikin gyara su zuwa matakai masu inganci.

KU KUMA KARANTA:Gwamnan Kaduna zai ba da ilimi kyauta ga ɗaliban Kuriga

A karon farko Jami’ar Jihar Zamfara na shirye-shiryen amincewa da shirin Hukumar Kula da Jami’o’i ta Ƙasa.

Mun umurci ’yan kwangilar da gwamnatin da ta shuɗe ta tilastawa barin wuraren aiki da su koma bakin aiki, kuma muna fatan nan da watanni masu zuwa, rukunin dindindin na jami’ar zai fara aiki. A lokaci guda, NUC za ta amince ga duk kwasa-kwasai.

“Mun karɓi mulki a jihar da gwamnati ta ƙi biyan kuɗaɗen jarrabawar WEAC da NECO har na biliyoyin Naira fiye da shekaru uku.

Dole muka yi shiri na musamman da hukumomin, kuma tun daga lokacin an fara biyan kuɗi a kan kari kuma za a kammala su a kan lokaci.

“A cikin ƙarancin albarkatunmu, za mu ci gaba da bayar da taimako ga jami’a. Burinmu shi ne mu ƙara haɓaka ilimi a jiharmu ta yadda za a samu damarmaki ga ɗaukacin matasanmu da za a horar da su don kai ga ƙololuwar da ilimi ke samarwa.”

Ƙungiyar Malaman Jami’o’i, ASUU, reshen Jami’ar Yusuf Maitama da ke Kano, ta koka kan rikicin da ke shirin kunno kai, idan har gwamnatin jihar ta gaza magance buƙatunta.

Ƙungiyar ta yi zargin cewa gwamnatin jihar ta shafe watanni tana yin watsi da buƙatunsu.

Hakan na ƙunshe ne cikin wata sanarwar haɗin gwiwa da shugaban reshen da kuma sakataren ƙungiyar Mansur Sa’ id da Yusuf Gwarzo suka sanya wa hannu a ranar Alhamis a Kano.

KU KUMA KARANTA:Zulum ya buƙaci Sojoji su samar da sansani a dajin Sambisa

Ya ce buƙatunsu guda uku ne waɗanda suka haɗa da inganta yanayin aiki ga mambobinsu.

Sauran kuma sun haɗa da bunƙasawa da kuma hanzarta samar da ci gaban jami’ar ta hanyar bayar da kuɗaɗen aiki mai ɗorewa, ƙarfafawa da kare ikon cin gashin kai na jami’a da ‘yancin ilimi.

Ƙungiyar ta ce ba ta so ta bayyana yanayin a fili ba amma ƙoƙarin da gwamnatin jihar ke yi na ganin ta biya musu buƙatunsu ya ci tura.

Gwamnatin Kaduna ta sanar da wasu sabbin matakai na bai wa makarantun jihar tsaro saboda yawan hare-haren da suke fuskanta da kuma satar ɗalibai.

Gwamna Uba Sani ya ce an ɗauki matakan ne a “ƙoƙarin da gwamnatin ke yi tuƙuru wajen magance matsalolin tsaro da suke yi wa fannin ilimi dabaibayi,” kamar yadda saƙon da ya wallafa a shafin X ya ƙunsa.

A cewar gwamnan, Jihar Kaduna na daga cikin jihohin da suka fi fama rikicin ‘yan bindiga da ta’addanci da sauran miyagun ayyuka.

Duk waɗannan jawabai Gwamna Uba ya yi su ne a taron horarwa da aka yi wa makarantun ‘yan sanda, da nufin ƙarfafa tsaro da bai wa fannin ilimi kariya.

“Gwamnatin jihar Kaduna na aiwatar da shirin SAFE SCHOOL domin karfafa tsaro a makarantun firamare da sakandare ta hanyar hadin gwiwa da rundunar ‘yan sandan Najeriya,” ya ce.

KU KUMA KARANTA: ‘Yan ta’adda sun yi wa wani sarki yankan rago a jihar Kaduna

Ga dai jerin matakan da Gwamnatin Jihar Kadunan ta ɗauka don kare makarantu da ilimi:

• Katange makarantu
• Haɗe wasu makantu waje ɗaya da sauya wa wasu matsugunai
• Kafa Kwamitocin Kai Agajin Gaggawa a fannin Tsaro inda za a zaɓo mambobin kwamitin daga makarantu da al’ummomin yankin
• Girke jami’an sa-kai na Kaduna KADVS zuwa makarantu – Samar da layin waya na gaggawa a makarantu
• Horon Wayar da Kan Tsaro ga Shugabannin Makarantu da malamai da sauran ma’aikatan makarantu
• Gina wuraren taruwar gaggawa a makarantu idan wani abu ya bijiro
• Horo kan yadda za a gane alamun barazana
• Gina hasumayar sa ido a makarantu.