Buhari ya taya ‘yan jarida murnar zagayowar ranar ‘yancin ‘yan jarida ta duniya

Shugaban ƙasa Muhammadu Buhari ya taya ‘yan jarida murnar zagayowar ranar ‘yancin ‘yan jarida ta duniya da ake yi a duk ranar 3 ga watan Mayu a faɗin duniya.

Bikin na bana ya cika shekaru 30 da yanke shawarar Majalisar Ɗinkin Duniya ta ayyana ranar ‘yancin ‘yan jarida ta duniya.

Shugaban ya bayyana ra’ayinsa ne a wata sanarwa da mai taimaka masa kan harkokin yaɗa labarai Mista Femi Adesina ya fitar ranar Talata a Abuja. A cewar shugaban, wannan gagarumin abin karramawa ne ga ƙwararrun kafafen yaɗa labarai, waɗanda suke kasadar rayuwarsu domin faɗakar da al’umma da kuma ilmantar da su.

KU KUMA KARANTA: An Gudanar Da Taron Horas Da Yan Jaridun Kaduna Kan Yanayin Yada Labaran Rikice-Rikice

A kan taken bana, “Siffata Makomar Haƙƙin: ‘Yancin faɗar albarkacin baki a matsayin tushen duk sauran haƙƙoƙin ɗan adam”.

Buhari ya bayyana farin cikinsa cewa an kare da kuma kiyaye ‘yancin ‘yan jaridun Najeriya a cikin shekaru takwas da suka gabata na mulkinsa.

“Mun kiyaye imani. Mun tabbatar da cewa ‘yan jaridun Najeriya sun samu ‘yancin gudanar da ayyukansu ba tare da wata matsala ba, kuma a wannan rana ta ‘yancin ‘yan jarida ta duniya, mun sake dagewa kan wannan ƙuduri, duk da cewa mun koma bakin aiki,” in ji shugaban.

Sai dai Mista Buhari ya buƙaci ƙwararrun kafafen yaɗa labarai da su ci gaba da kasancewa masu kishin ƙasa, da yin aikin haɗin kan ƙasar, da kuma gudanar da ‘yancinsu tare da ɗaukar nauyi mai yawa.