Shugaban ƙasa Muhammadu Buhari ya bar Najeriya a yau asabar domin halartar taron majalisar ɗinkin duniya kan ƙasashe masu ci gaba karo na 5 a Doha babban birnin kasar Qatar.
A cikin wata sanarwa da babban mataimaki na musamman ga shugaban ƙasa kan harkokin yaɗa labarai Garba Shehu ya fitar, ya ce ziyarar a hukumance ta biyo bayan gayyatar da Sarkin Qatar, Sheikh Tamim bin Hamad Al Thani ya yi masa.
A cewar Garba Shehu, za a gudanar da taron ne daga ranar 5 zuwa 9 ga watan Maris mai taken ‘Daga mai yiwuwa zuwa wadata’. Ya ƙara da cewa taron yana gudana sau ɗaya a cikin shekaru goma kuma yana ba da damar samun goyon bayan ƙasashen duniya don hanzarta ci gaba mai ɗorewa a ƙananan hukumomi tare da taimaka musu don samun ci gaba da wadata.
KU KUMA KARANTA: Shugaba Buhari ya taya Tinubu murna, ya gargaɗi ‘yan adawa su tuna alƙawarin zaman lafiya da suka yi
Sanarwar ta ƙara da cewa, “A birnin Doha, shugaba Buhari zai ƙarfafa ƙudurin Najeriya na tallafawa ƙasashe masu rauni don tunkarar ƙalubalen ci gaban da suke fuskanta, inda ya bayyana yankunan da gwamnatin Najeriya ta samar musu da nau’o’in taimako na tsawon lokaci,” in ji sanarwar.
“Yayin da akasarin ƙasashen nan ke fafutukar neman dawwama hanyoyin magance ƙalubalen talauci, illar sauyin yanayi, matsalar abinci da makamashi da kuma ɗimbin basussuka da sauransu, shugaban na Najeriya zai ƙara jaddada buƙatar samar da mafita mai ɗorewa ga ƙasashen da ke fuskantar matsalar waɗannan munanan ƙalubale.”
Ana sa ran taron zai samu halartar shugabannin ƙasashen duniya, kamfanoni masu zaman kansu, ƙungiyoyin farar hula da kuma ƙungiyoyin matasa.
Fadar shugaban kasar ta kuma yi bayanin cewa tana da burin raba ra’ayoyin ci gaba da kuma haɗa kan siyasa, haɗin kai, aiki da mafita don kawo sauyi ga ci gaban ƙananan hukumomin, ta hanyar samar da mafita mai dorewa kan ƙalubale daban-daban, yayin da suke fafutukar cimma muradun ci gaba mai dorewa (SDGs) nan da shekarar 2030.
Garba Shehu ya ƙara da cewa ƙalubalen da ya kamata a magance sun haɗa da talauci, ƙarancin abinci, yunwa, rauni ko rashin ababen more rayuwa, rashin isassun cibiyoyin kiwon lafiya, da sauyin yanayi da dai sauransu.
“Tawagar Shugaba Buhari ta haɗa da wasu Ministoci da manyan jami’an gwamnati waɗanda ake sa ran za su yi amfani da damar ziyarar wajen sanya hannu kan wasu yarjejeniyoyin da kuma yarjejeniyar fahimtar juna da gwamnatin Qatar”
“Ana sa ran shugaban ƙasar zai dawo kasar a ranar Laraba, 8 ga Maris,” in ji kakakin shugaban.
