An kama Limamin coci a Legas bisa zargin rashin taimakon wata mata

Wani Fasto mai shekaru 40, David Ihejirika, wanda ake zargi da samun Naira miliyan 1.1 a wajen wata mata, domin ya taimaka mata ta dawo da soyayyar da mijinta ya gushe, ya gurfana a gaban wata kotun majistire da ke Ojo a Legas.

Wanda ake ƙara ya gurfana a gaban Alƙalin Kotun Majistire L.K.J Layeni, bisa tuhume-tuhume uku na samun kuɗi ta hanyar ƙarya, wanda ya haifar da rashin zaman lafiya da kuma sata.

Sai dai ya musanta zargin da ake masa. Ɗan sanda mai gabatar da ƙara, Dakta Simon Uche ya shaida wa kotun cewa wanda ake ƙara ya aikata laifin ne a wani lokaci a shekarar 2021, a wani wuri da ake ƙira “The Strip of Jesus Christ Church” da ke Ajangbadi, Ojo.

KU KUMA KARANTA: ‘Yan sanda sun kama mutumin da ya kashe tsohuwar matarsa, saboda za ta sake yin aure

Ya yi zargin cewa wadda ake ƙara ta samu zunzurutun kuɗi har Naira miliyan 1.1 daga hannun wata mai ƙara, Misis Chinwe Nwafor, tare da yi mata alƙawarin yi mata “aiki na ruhi”, domin maigidanta ya dawo gare ta.

An ce wakilcin ƙarya ne saboda faston da ake zargin ya saci kuɗin bai aiwatar da alƙawarinsa ba.

Saboda haka, an ce wanda ake tuhuma ya gudanar da kansa ta hanyar da za ta iya lalata zaman lafiyar jama’a ta hanyar irin wannan mataki.

Laifin ya ci karo da tanadin sashe na 168, 287 da 314 na dokar laifuka ta jihar Legas ta 2015.

Kotun ta bayar da belin wanda ake ƙara a kan kuɗi N500,000 tare da mutane biyu masu tsaya masa.

Ya ɗage sauraren ƙarar har zuwa ranar 7 ga watan Yuni domin yi masa shari’a.