Wasanni
Farin cikina ya dawo bayan komawa Inter Miami – Messi
Lionel Messi ya ce farin cikinsa ya dawo tun bayan komawarsa ƙungiyar Inter Miami.
Messi ya bayyana haka ne lokacin da yake tattaunawa da manema labarai, inda ya ce komawarsa Amurka ta sha bambam, idan aka kwatanta lokacin da ya koma Paris Saint-Germain (PSG) ta Faransa daga Barcelona.
Ya zura ƙwallaye tara a cikin wasanni shida tun ya koma Inter Miami, bayan shafe shekara biyu da PSG a Faransa.
“Kamar yadda na faɗa a lokacin, komawa ta Faransa ba abu ne da na so ba, saboda ba na son barin Barcelona,” in ji Messi.
Ya ce yana jin daɗin rayuwa kudancin Florida a yanzu.
KU KUMA KARANTA: An dakatar da ‘yar tseren Najeriya Nwokocha daga wasanni kan amfani da haramtattun ƙwayoyi
“Na sha wahala wajen sabawa da wurin da ya sha bamban da inda na shafe tsawon rayuwata ina zaune, musamman ma yanayin birnin da kuma ɓangaren wasa, gaskiya abu ne da na wahala, amma a yanzu saɓanin haka nake gani a Amurka,” in ji shi.
Messi mai kyautar Ballon d’Or bakwai yana da damar lashe kofinsa na farko da Miami yayin da za ta fafata da Nashville a wasan ƙarshe na Leagues Cup a ranar Asabar.
Sadiya Haruna ta sake aure karo na 10
Jarumar TikTok, Sayyada Sadiya Haruna ta sake amarcewa a ranar Juma’a watanni kaɗan da mutuwar aurenta da jarumin TikTok Al Ameen G-Fresh.
A wani kati da ta wallafa a shafinta na Instagram, Sadiya ta bayyana sunan angon nata a matsayin Hon. Babagana Audu Grema.
An daura auren ne da misalin ƙarfe ɗaya bayan sallar Juma’a kamar yadda katin ya nuna a birnin Maiduguri da ke jihar Borno a arewa maso gabashin Najeriya.
KU KUMA KARANTA:Gwamnatin tarayya ta bai wa Rahama Sadau muƙami
Auren na zuwa mako guda bayan da jarumar ta TikTok ta bayyana a shirin tattaunawa na jarumar Kannywood Hadiza Gabon “Gabon Talk Show” inda Sadiya ta caccaki G-Fresh tare da bayyana matsalolin da suka kai ga mutuwar aurenta da shi.
Auren har ila yau na zuwa ne kwana guda bayan da shirin na Gabon ya watsa tattaunawar mayar da martani da G-Fresh inda shi ma ya yi ta sukar tsohuwar matar tasa – mafi aksarin lokuta a kaikaice.
COPA America: Panama ta yi nasara kan Amurka
Hukumar ƙwallon ƙafa ta Amurka ta yi Allah wadai da kalaman nuna wariyar launin fata ga ‘yan wasanta a ranar Alhamis, bayan da Panama ta yi nasara a kan Amurka da ci 2-1 a gasar cin kofin Copa America.
A wani saƙo da ta wallafa a shafin X, hukumar ƙwallon ƙafa ta Amurka ta ce “Babu shakka, babu wuri a cikin wasa na irin wannan halayya ta nuna ƙiyayya da wariya.”
Sanarwar ta ƙara da cewa “Waɗannan ayyukan ba kawai ba za’a amince da su ba ne, amma kuma sun saɓa wa kimar mutuntawa da haɗa kai da muka ɗauka a matsayin hukuma.”
KU KUMA KARANTA:Manchester City ta lashe Firimiyar Ingila sau huɗu a jere
Timothy Weah, wanda baƙar fata ne, yana ɗaya daga cikin ‘yan wasan da aka ci zarafin su. An bai wa ɗan wasan gaba na Amurka jan kati kai tsaye a minti na 18 da fara wasa, saboda hannu da ya sa ya bugi ɗan wasan Panama a bayan kan sa a lokacin da ƙwallon ta fita wajen filin wasa.
Ɗan wasan Amurka Folarin Balogun ya zura ƙwallo a minti na 22 da fara wasan bayan an bai wa Weah jan kati kafin ɗan wasan Panama Blackman ya farke a minti na 26.
Fajardo ya zura ƙwallo da ta bai wa Panama nasara da ci 2-1 a minti na 83.
Weah ya fitar da wata sanarwa ta kafafan sada zumunta, inda ya bayar da haƙuri tare da neman gafarar waɗanda ya ɓata wa rai.
Yanzu haka dai Amurka, wacce ita ce ke karɓar baƙuncin gasar cin kofin na Copa America, muddin tana son zuwa zagaye na gaba to dole ne ta yi nasara a wasanta da Uruguay da zura ƙwallaye wanda ko da Panama ta yi nasara kan Bolivia za ta samu tsallake wa.
Yalon kati ya hana Slovenia hawa mataki na biyu a guruf ɗin gasar Euro 2024
Yayin da ake kammala zagayen matakin guruf-guruf a gasar Euro 2024 da ke gudana a ƙasar Jamus, a Rukunin C, ƙasashen Slovenia da Denmark sun yi kankankan a yawan maki da yawan ƙwallaye, inda duka suka ƙare da maki uku.
A rukunin nasu, Ingila ce ta zo ta farko da maki 5 bayan ta ci wasa ɗaya kuma ta yi canjaras sau biyu. Sai Serbia da ta zo ta ƙarshe da maki biyu, bayan ta yi canjaras sau biyu da rashin nasara sau ɗaya.
Sai dai ba a iya tantance wace ƙasa ce ta biyu ba a rukunin, kasancewar Denmark da Slovenia kowannensu yana da maki uku, bayan yin canjaras sau uku. Ko da aka duba yawan ƙwallayen da kowa ya ci da waɗanda aka ci shi, ƙasashen sun kuma yin arba.
Wannan ne ya tilasta wa hukumar ƙwallon ƙafa ta Turai, UEFA yin amfani da wata dokar da ba a saba jin ta ba, don fayyace waye yake mataki na biyu, don a san da wa zai kara a matakin gaba na ‘yan-16.
KU KUMA KARANTA: Manchester City ta lashe Firimiyar Ingila sau huɗu a jere
Sakamakon haka ne, aka duba wace tawaga ce ta fi ladabi, inda aka duba yawan katin gargaɗi da aka bai wa kowace ƙasa cikin wasanni uku da suka buga. Sai dai an kuma samun yawan katin nasu shi ma daidai ne.
A nan ne UEFA ta duba cewa cikin yalon katunan da aka bai wa tawagar Slovenia, akwai ɗaya da aka bai wa mataimakin kocinsu, Novakovic Milivoje, wanda ya sa aka yanke hukuncin cewa hakan ya nuna Denmark sun fi Slovenia nuna ladabi.
Wannan ne ya ba wa ƙasar Denmark dama ta samu haye wa gaban Slovenia inda ta zamo a mataki na biyu a rukunin, kuma ta tsallaka zuwa matakin siri-ɗaya-ƙwale kai-tsaye.
Amma kuma duk da cewa Slovenia ta ƙare a mataki na uku, ta samu cancantar wucewa matakin na gaba, wanda shi ne karon farko da ta kai irin wannan mataki a wata babbar gasa, a tarihin ƙasar.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano