Labarai
‘Yan bindiga sun kashe ‘yan banga tara a jihar Bauchi
Wasu da ake zargin ‘yan bindiga ne sun kashe wasu ‘yan banga guda tara da aka fi sani da ‘Yan Ba Beli a jihar Bauchi.
An kashe ‘Yan Ba Beli ne a dajin ƙauyen Gamji a lokacin da suke neman ‘yan fashi da suka addabi al’ummar ƙaramar hukumar Ningi tare da kashewa tare da yin garkuwa da mutanen da ba su ji ba ba su gani ba domin neman kuɗin fansa.
‘Yan bindigar sun kai harin ne a ‘yan Ba Beli a lokacin da suka yi musu kwanton ɓauna inda suka yi nasarar kashe 9 daga cikinsu, yayin da wasu ‘yan kaɗan suka jikkata.
Lamarin ya faru ne da yammacin ranar Lahadi, 15 ga watan Oktoba, 2023, a lokacin da ’yan Ba Beli ke hawan duwatsun da ke kewayen ƙauyen Gamji domin neman ‘yan bindigar da ke dajin.
Wani daga cikin ’yan banga a yankin da ya nemi a sakaya sunansa ya shaida wa jaridar Nigerian Tribune cewa ‘yan bindigar sun yi musu kwanton ɓauna a dajin lokacin da suka faɗa cikin dajin.
KU KUMA KARANTA: ‘Yan bindiga sun kashe mutane da dama, sun yi garkuwa da wasu a Kano
Ya ƙara da cewa lokacin da suka faɗa kwanton ɓaunan, ‘yan bindigar sun buɗe masu wuta da manyan makamai inda suka yi galaba a kan ‘yan Ba Beli, inda suka kashe tara daga cikinsu, tare da jikkata wasu.
Shugaban riƙo na ƙaramar hukumar Ningi, Hon. Ibrahim Zubairu Mato, wanda ya tabbatar da faruwar lamarin, ya ba da tabbacin cewa gwamnati za ta ci gaba da yin duk mai yiwuwa don kare rayuka da dukiyoyin jama’a da ba su ji, ba su gani ba a yankin.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano