Hukumar ƙididdiga ta ƙasa, (NBS), ta ce kamfanin jiragen ƙasa na Najeriya ya samu kuɗaɗen shiga na Naira miliyan 768.44 daga fasinjoji a cikin Q1 na shekarar 2023.
Wannan yana ƙunshe ne a cikin bayanan sufurin jiragen ƙasa na NBS na Q1 2023 da aka fitar a Abuja ranar Laraba.
Rahoton ya nuna cewa adadin ya ragu da kashi 63.02 cikin ɗari idan aka kwatanta da Naira biliyan 2.08 da aka samu a Q1 na shekarar 2022.
Ya nuna cewa an tara Naira miliyan 181.27 a cikin Q1 2023 a matsayin kuɗaɗen shiga daga kayayyaki, wannan ya ƙaru da kashi 99.28 bisa ɗari daga Naira miliyan 90.96 da aka samu a Q1. 2022.
KU KUMA KARANTA: Majalisa za ta gayyaci Ministar Kuɗi, gwamnan CBN da sauransu, kan matsalolin sufurin jiragen sama a Najeriya
Rahoton ya bayyana cewa sauran rasit ɗin sun kai naira miliyan 34.17, wanda ya nuna raguwar kashi 41.02 cikin ɗari a cikin Q1 2023, daga naira miliyan 57.92 da aka karɓa a Q1 2022.
Rahoton ya kuma nuna cewa adadin fasinjojin da ke jigilar jiragen ƙasa a Q1 2023 ya ragu da 511,374.
“Wannan ya yi ƙasa da na 953,099 da aka yi rikodin a cikin Q1 2022, yana wakiltar ƙimar girma na -53.65 bisa ɗari.”
Bugu da ƙari, rahoton ya nuna cewa an yi jigilar tan 59,966 na kayayyaki a cikin Q1 2023, idan aka kwatanta da tan 39,379 da aka ruwaito a cikin Q1 2022.
