Labarai
Najeriya ta samu tallafin dala biliyan 1.3 Don ƙarasa hanyar jirgin ƙasa daga Kano zuwa Nijar
Najeriya ta samo tallafin dala biliyan 1.3 domin kammala aikin layin dogo da zai haɗa Kano, birni mafi girma a arewacin Najeriya zuwa Maraɗi dake maƙwabciyar ƙasar Nijar, in ji ma’aikatar sufuri a ranar Laraba.
Ana sa ran layin dogon zai ƙarfafa tattalin arziƙi da zamantakewar da ke tsakanin ƙasashen domin bunƙasa hulɗar kasuwanci da al’adu tsakaninsu.
Sanarwar da ma’aikatar sufuri ta fitar ta ce, za a ba da tallafin ne daga wata gamayyar haɗin gwiwa da kamfanin gine-ginen na ƙasar Sin (CCECC) ke jagoranta, wanda zai ba da kaso 85% na jimillar kuɗaɗen.
Gwamanatin Najeriya kuma za ta biya sauran kaso 15% tare da bankin fitar da shigar da kaya na Afirka da kuma bankin raya ƙasashen nahiyar Afirka.
Kakakin ma’aikatar sufuri Jamilu Ja’afaru ya ce “samun dalar Amurka biliyan 1.3 na nuni da wani gagarumin ci gaba wajen kammala wannan muhimman ababen more rayuwa.”
KU KUMA KARANTA:Kotu ta ƙi amincewa a saki bayanan kadarorin Buhari da Jonathan
A watan Yuli, kamfanin gine-gine mafi girma a ƙasar Portugal Mota-Engil ya tattaɓa hannu kan wata kwangilar Euro miliyan 840 kwatankwacin dalar Amurka miliyan 919 don samarwa da kuma ba da kuɗin jigilar layin dogon.
Gwamnatin Najeriya ta yi ƙoƙarin sake gina arewacin ƙasar da ke fama da talauci, wanda wasu sassa na ƙasar suka yi ɓarna tun shekaru goma da suka gabata a hannun masu kaifin kishin Islama.
Wannan aiki dai wani shiri ne na gina layin dogo a faɗin Najeriya domin magance rashin wadatattun ababen more rayuwa da ke kawo cikas ga ci gaban tattalin arziƙin ƙasar shekaru da dama.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano