Labarai
Gwamnatin tarayya ta shirya gyaran hanyar jirgin ƙasa na Abuja, zai lanƙwame naira biliyan biyar
Daga Nusaiba Hussaini
A ranar Juma’ar da ta gabata ne hukumar babban birnin tarayya Abuja ta sanar da bayar da kwangilar aikin gyaran hanyar jirgin ƙasa na Abuja akan kuɗi naira biliyan biyar.
Kamfanin Dillancin Labarai na Najeriya (NAN) ya ruwaito cewa kamfanin China Civil Engineering Construction Corporation Ltd (CCECC) ne zai gudanar da aikin cikin watanni 12.
Mista Olusade Adesola, babban sakatare na FCTA, ya ce manufar ita ce a maido da muhimman ababen more rayuwa na sufurin jiragen ƙasa, wanda ya bayyana a matsayin “jinin rayuwar birnin Abuja”.
Ya bayyana cewa ɓarkewar cutar ta COVID-19 ta sa an dakatar da tsarin jirgin ƙasa na wucin gadi a matsayin wani ɓangare na matakan daƙile yaɗuwar cutar.
KU KUMA KARANTA: Yadda gwamnan Legas yayi gwajin jirgin ƙasa mai amfani da lantarki
Adesola ya ƙara da cewa a lokacin rashin aiki, ‘yan bindiga sun lalata muhimman kayan aikin layin dogo, wanda hakan ya kasance “mummunan koma baya”.
Sakataren dindindin ya ce an bayar da kwangilar samar da tsaro ga tsarin ARMT.
“Muna ɗaukar tsauraran matakai don kare wannan kadari mai kima.
“Ba za mu ƙyale ayyukan ƴan barna su lalata ci gaba da yuwuwar wannan muhimmin hidimar jama’a ba.
“Ba za mu bar wani abu ba wajen maido da tsarin jirgin ƙasa na Abuja zuwa matsayin da yake da shi da kuma tabbatar da ya zarce ayyukan da ya yi a baya,” inji shi.
Adesola ya bayyana cewa gyaran zai haɗa da gyarawa da sauya kayan aikin da suka lalace, inganta kayan aiki, da kuma aiwatar da matakan tsaro na zamani domin kariya daga barazanar da za a fuskanta a nan gaba.
“Ba da jimawa ba za mu shaida dawowar tsarin sufuri mai inganci kuma abin dogaro.
“Wannan ya faru ne saboda sake farfaɗo da tsarin zirga-zirgar jiragen ƙasa na Abuja ba wai kawai a gyara kayayyakin more rayuwa ba ne; hakan ya nuna irin tsayin dakan garinmu da al’ummarsa.
“Yana nuna aniyarmu ta shawo kan ƙalubale da kuma jajircewar mu na kyautata rayuwar ‘yan ƙasarmu.
Adesola ya ƙara da cewa “Wannan nuni ne na sadaukarwar da gwamnatinmu ta yi na samar da yanayi mai dacewa don bunƙasar tattalin arziƙi da walwalar jama’a.”
Daraktan Sufuri na FCTA, Mista Joseph Akinteye, ya bayyana cewa aikin ya ƙunshi Lots 1 A da 3, wanda ya kai tsawon kilomita 45.245.
Akinteye ya ce tsarin na ARMT na farko ya kai kilomita 77.775 amma kilomita 45.245 ne kawai aka kammala a shekarar 2017, aka fara aiki a shekarar 2018, sannan kuma aikin gwaji ya ɗauki tsawon watanni 20.
“Abin takaici, sabis ɗin gwaji ya ƙare ba zato ba tsammani a cikin Maris 2020, saboda ɓullar cutar ta COVID-19 da kuma ƙa’idodinta,” in ji shi.
Ya ce gyaran, idan aka kammala, zai dawo da ayyukan layin dogo.
A cewarsa, illar da ke tattare da hakan za ta zama wani babban taimako ga illar da ake fama da ita na cire tallafin man fetur ga ‘yan Najeriya, musamman mazauna birnin tarayya Abuja.
Ya yi alƙawarin cewa nan da watanni 12 za a kammala gyaran.
Wani mutum ya yi barazanar kashe kansa kan tsadar rayuwa
Daga Idris Umar, Zariya
An kuɓutar da wani mutum da ya hau saman dogon ƙarfen Sabis ɗin gidan rediyo yana yunƙurin kashe kansa ranar Litinin a Abuja.
Mutumin mai suna Shuaibu Yusuf, wanda ɗan asalin Jihar Borno ne, an kuɓutar da shi daga kan dogon ƙarfen bayan da jami’an agajin gaggawa suka yi ta roƙonsa da yayi haƙuri ya sauko, inda daga bisani ‘yan sanda suka kama shi.
Shu’aibu ya sha alwashin sadaukar da rayuwarsa domin al’amuran da ke damun al’ummar ƙasar, yayin da yake rokon ‘yan Najeriya da su ba shi haɗin kai, yana mai jaddada cewa a shirye ya ke ya sadaukar da rayuwarsa kan abubuwan da ya ƙira mummunan halin Rayuwa.
KU KUMA KARANTA: Muna ƙoƙarin kuɓutar da ɗaliban jami’ar da ‘yan bindiga suka sace – Gwamnatin Kogi
Ya buƙaci da a maido da tallafin man fetur, tare da ayyana dokar ta ɓaci kan rashin tsaro, sannan Gwamnati ta ɗauki matakin gaggawa a Jihohin Zamfara, Sokoto, Kebbi, Katsina, Neja, da Borno domin yaƙar ta’addanci da kuma dawo da zaman lafiya.
Mutumin ya kuma buƙaci a buɗe kan iyakokin ƙasar nan domin shigo da abinci domin shawo kan matsalar karancin abinci, sannan kuma ya kamata Gwamnati ta magance matsalar yaran da ba sa zuwa Makaranta.
Mun sami rahoto cewa jami’an hukumar bada agajin gaggawa ta ƙasa NEMA da jami’an Babban Birnin Tarayya ne suka hallara domin kuɓutar da shi.
A cewar rahoton, mutumin ya hau kan ƙarfen Eriya da ake zargin na gidan rediyon Aso ne bayan ya ajiye takardar da ke bayyana manufarsa da buƙatunsa.
Masana sun tabbatar da cewa a baya-bayan nan ana samun karuwar al’ummar dake kasar dake kashe kawunansu saboda halin ƙunci da tsadar rayuwa da ake ciki.
Wasu masana harkokin kiwon lafiya sun ɗora alhakin yunkurin kashe kawunan da matsalar taɓarɓarewar tattalin arziki da yunwa a ciki da wajan ƙasar.
Kotu ta umarci Sadiya Farouq ta yi bayani kan yadda aka kashe biliyan N729 na tallafi
Kotun Tarayyar da ke Legas ta umarci tsohuwar ministar ayyukan jin ƙai a gwamnatin Buhari wato Sadiya Umar-Farouq ta yi bayani kan yadda ta kashe naira biliyan 729 da gwamnatin ƙasar ta bai wa ‘yan Najeriya miliyan 24 a watanni shida na 2021.
Haka kuma kotun ta bayar da umarni ga tsohuwar ministar ta kawo jerin sunayen mutanen da aka biya kuɗin, da kuma jihohin da waɗanda aka biya kuɗin suka fito da kuma adadin da kowace jiha ta samu.
Ƙungiyar nan da ke yaƙi da cin hanci ta SERAP a Najeriya ce ta shigar da tsohuwar ministar ƙara inda ta buƙaci a yi bayani kan yadda aka raba kuɗin a zamanin Buhari.
Kotun ta bayyana cewa ƙungiyar da ta shigar da ƙarar ta buƙaci a ba ta bayanai dangane da kuɗin da aka raba wa ‘yan ƙasar a 2021.
Ƙungiyar ta SERAP ta yi jinjina ga hukuncin da alƙalin kotun Deinde Isaac Dipeolu ya yanke inda ya ce hakan “nasara ce ga gaskiya da riƙon amana wurin kashe kuɗaɗen jama’a.”
Tuni dai SERAP ɗin ta aika wasiƙa ga ofishin shugaban Nijeriya Bola Tinubu da kuma babban lauyan kasar domin su bi umarnin hukuncin da kotun ta yanke.
KU KUMA KARANTA: Shugabannin bankuna na amsa tambayoyi kan badaƙalar Beta Edu da Sadiya — EFCC
“Muna buƙatar ku umarci ma’aikatar jin kai da ta gaggauta tattara tare da fitar da bayanan kashe kudade na naira biliyan 729 (dala miliyan 467) kamar yadda kotu ta bayar da umarni,” in ji mataimakin daraktan ƙungiyar, Kolawole Oluwadare a ranar Asabar.
An ja hankalin ‘yan Najeriya kan shirin ƙungiyoyin asiri na ɗaukar sabbin mambobi
Rundunar ‘yan sandan Najeriya ta ja hankalin ‘yan ƙasar game da shirin ƙungiyoyin asiri na ɗaukar sabbin mambobi a faɗin ƙasar musamman a jami’o’i da manyan makarantu.
Mai magana da yawun rundunar ‘yan sandan Najeriya reshen Jihar Ribas Grace Iringe-Koko ce ta yi wannan jan hankali a cikin wata sanarwa da ta fitar ranar Asabar da maraice a birnin Fatakwal.
Ta bayyana cewa wata babbar ƙungiyar asiri ta Najeriya tana shirin gudanar da gagarumin biki ranar Lahadi a faɗin Najeriya, musamman a jami’o’i don tunawa da mutumin da ya kafa ta.
“Rundunar ‘yan sandan Jihar Ribas ta samu bayanai game da bikin da ƙungiyar Neo-Black Movement (NBM) za ta yi a faɗin ƙasar ranar 7 ga watan Yulin 2024. Ƙungiyar, wadda ake yi wa laƙabi da Aiye ko Black Axe, tana shirin gudanar da bikin ne domin tunawa da wanda ya kafa ta.
KU KUMA KARANTA: Shugaban hukumar leƙen asirin sojin Isra’ila ya yi murabus saboda harin Hamas na 7 ga Oktoba
Bikin, wanda aka sanya wa suna Ranar AIYE ko 7/7 za a gudanar da shi ne a dukkan jihohin da ke faɗin ƙasa, musamman a manyan makarantu,” in ji sanarwar.
An gargaɗi masu ta da hankalin jama’a a Bikin Dodanni na Egungun a Jihar Oyo
Rundunar ‘yan sandan ta ce tana sane da munanan ayyukan ƙungiyar asirin na kisan mutane a manyan makarantu da faɗace-faɗace a tsakanin ƙungiyoyin asiri da tayar da zaune-tsaye da sauran manyan laifuka.
Ta ce yanzu haka ta baza ƙarin jami’an ‘yan sanda zuwa wasu wurare domin daƙile ayyukan ƙungiyoyin asiri, sannan ta yi ƙira ga iyaye su gargaɗi ‘ya’yansu su guji shiga ayyukan ƙungiyoyin asiri.
“Ana bai wa manyan makarantu shawarar ƙara matakan tsaro da kuma sanya idanu sosai domin tabbatar da tsaron dukkan ɗalibai.
Kazalika ana ƙira ga dukkan makarantu su lura da duk wani taro na ɗalibai da bai kwanta musu a rai ba,” a cewar sanarwar.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano
Pingback: Za mu sake duba biyan albashin ma’aikatan gwamnati – Tinubu ga shugaban bankin duniya | Neptune Prime Hausa
Pingback: A guji bin hanyar Bauchi zuwa Gombe saboda rugujewar gada – FRSC | Neptune Prime Hausa