An yi musayar fursunoni tsakanin Amurka da Rasha
Shugaban Amurka Joe Biden ya jaddada cewa fito da Amurkawa da sauran ‘yan wasu ƙasashen daga gidajen yarin Rasha wata babbar nasarace ta ɓangaren Diflomasiyya da ƙawance.
Musayar fursunoni da aka yi jiya Alhamis tsakanin Rasha da ƙasashen Yammacin duniya ya samo asali ne lokaci mai tsawo da ke cike da sarƙaƙiya, wanda kuma aka kwashe dogon lokaci ana tattaunawar diflomasiyya tsakanin ƙasashe.
Shugaban Amurka Joe Biden, a cikin jawabin da ya yi daga fadar White House, tare da ‘yan uwan Amurkawan da aka ‘yantar, ya jaddada yadda Amurka ta yi aiki kafaɗa-da-kafaɗa da manyan ƙasashe abokan hulɗarta a Turai.
Biden ya jaddada cewa fito da Amurkawa da sauran ‘yan wasu ƙasashe daga gidajen yarin Rasha wata babbar nasarace ta ɓangaren diflomasiyya da ƙawance.
KU KUMA KARANTA;Joe Biden ya janye daga takarar shugaban Amurka
Yace, “Don haka ga duk wanda ke tambaya ko abokan kwance na da mahimmanci, lallai haka ne. Suna da mahimmanci.”
Jawabin na shugaban ƙasar na jam’iyyar Democrat inda ya jaddada muhimancin ƙawance, ya bambanta da na tsohon shugaban ƙasa kuma ɗan takarar shugaban ƙasa na jam’iyyar Republican, Donald Trump, wanda harkokin cikin gida ne ya fi maida hankali akai.
An tambayi Biden kan abin da zai ce game da iƙirarin Trump na cewa zai iya ‘yantar da dukkan Amurkawa ba tare da wata yarjejeniya ba.
Biden ya amsa da cewa, “Me yasa bai yi haka ba a lokacin da yake shugaban ƙasa?”
Daga bisani Trump, ya caccaki yarjejeniyar a shafukan sada zumunta, inda ya ƙira musayar fursunonin a matsayin barazana ga Amurka.
