Labarai
An kashe mutum 16 a wani hari a Jihar Filato
Aƙalla mutum 16 ne suka mutu a wani hari da aka kai ƙauyen Mushu da ke Jihar Filato a yankin arewa ta tsakiyar Najeriya.
Kamfanin dilancin labarai na AFP wanda ya ce rundunar sojin ƙasar ce ta tabbatar masa da harin, ya rawaito Kyaftin Oya James ya shaida mata cewa lamarin ya faru ne da tsakar daren ranar Asabar.
Rikicin ƙabilanci da kuma na manoma da makiyaya ya zama tamkar ruwan dare a Jihar Filato, wanda aka shafe shekaru ana fama da shi, kuma yana yawan jawo asarar rayuka.
“Muna barci sai kwatsam muka ji wata ƙara mai ƙarfi,” in ji wani mazaunin ƙauyen Markus Amorudu.
“Mun tsorata sosai saboda ba mu tsammaci wani hari ba. Mutane sun ɓuya, amma maharan sun kama da yawa daga cikinmu, an kashe wasu an jikkata wasu,” a cewar ganau ɗin.
Har yanzu ba a gano musabbin kai harin ba, sannan ba a san waɗanda suka kai shi ba.
KU KUMA KARANTA: Za mu hukunta masu hannu a harin Tudun Biri — Hafsan Tsaro
Sai dai tuni aka aika jami’an tsaro don kare ɓarkewar rikici a yankin, inda ake yawan samun hatsaniya tsakanin makiyaya da yawancinsu Musulmai ne da kuma manoma da yawancinsu Kiristoci ne.
Gwaman Jihar Caleb Mutfwang ya yi Allah wadai da wannan hari yana mai ƙiransa “mummunan da bai kamata ba,” tare da shan alwashin gano waɗanda suka kai shi da kuma tabbatar da cewa sun fuskanci hukunci.
“Gwamnati za kuma ta ɗauki matakan da suka dace don daƙile hare-haren da ake kai wa kan fararen hular da ba su ji ba ba su gani ba,” kamar yadda mai magana da yawun gwamnan, Gyang Bere ya gaya wa manema labarai.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano