Ina cikin ƙoshin lafiya – Obasanjo
Tsohon shugaban Najeriya Olusegun Obasanjo ya ce ya na nan da ransa, amma wasu mutane na amfani da kafofin sada zumunta wajen yaɗa mutuwarsa.
Obasanjo ya bayyana hakan ne a lokacin da ya ke gabatar da jawabi a wajen ƙaddamar da tsohuwar hanyar Garage/Oke Fia-Lameco da ke garin Osogbo na jihar Osun, inda ya ce shi da kan shi ya samu labarin da ake yaɗawa kan mutuwar tasa.
Na gani a kafofin sada zumunta ana yaɗa cewa wai na mutu, shi ne nayi gaggawar saidawa ƴaƴana da dangina cewa ba gaskiya ba ne ina raye. Waɗanda suke so na mutu, burinsu ke nan amma har yanzu Ubangiji ya bar ni da raina.
Tsohon shugaban Najeriya ya ce bai san dalilin da ya sa wasu ke masa fatan mutuwa ba, duk da cewa suma ba za su kauce mata ba.
KU KUMA KARANTA: Rikicin Sudan ya yi sanadin mutuwar dubban mutane tare da raba fiye da mutum miliyan 11 da muhallansu – MƊD
Obasanjo ya nuna rashin jin daɗinsa game da yaɗa irin waɗan nan labarai, waɗanda ya bayyana a matsayin masu ɓata rai da wasu ke amfani da fasaha wajen ƙirƙiransu.
