Wasu mahara a Filato sun yi wa wani matashi yankan rago
Wasu mahara sun yi wa wani matsahi ɗan shekara 32 yankan rago a yankin Kampani da ke Ƙaramar Hukumar Wase ta Jihar Filato.
Shugaban matasan yankin, Sapi’i Sambo, ya ce an yi wa matashin mai suna Usama Ɗanladi, yankan rago ne a yayin da yake barci a ɗakinsa da dare.
Ya bayyana cewa mutanen gidan su Usama ne daga baya suka tsinci gawarsa cikin jini da wuyansa a yanke.
Yankin Kampani dai na yawan fama da matsalar ’yan fashin daji da sauran nau’i kan taddanci, waɗanda suka laƙume rayuka da dama, baya da garkuwa da mutane.
Sapi’i Sambo, ya bayyana cewa ‘‘An sanar da ’yan sanda da sauran jami’an tsaro game da kisan gillar da aka yi wa Usama.
KU KUMA KARANTA: Yan sanda sun kama wani matashi da ya yi wa ’yar shekara 4 yankan rago a gidansu
“Muna yaba wa jami’an tsaro bisa ƙoƙarin da suke yi a wannan yankin, amma ga shi duk da kasancewansu a nan ’yan fashin daji sun shigo sun kashe Usama.
“Muna roƙon Gwamnatin Tarayya ta ƙaro mana jami’an tsaro domin daƙile waɗannan miyagun ayyuka.
“Gaskiya muna cikin damuwa kuma muna matukar bukatar ƙarin jami’an tsaro.”
Zuwa lokacin da aka kammala haɗa wannan labari dai babu wani bayani daga rundunar ’yan sandan jihar.
