Labarai
Al’ummar Nijar na maraba da matakin ECOWAS na janye musu takunkumi
Matakin ɗage wa ƙasashen Mali da Nijar da Burkina Faso da kuma Guinea takunkumin da ƙungiyar ECOWAS ko CEDEAO ta sanar a ƙarshen taron shugabannin ƙasashen Yammacin Afirka da ya gudana a wannan Asabar 24 ga watan Fabrairu a Abuja ya saka farin ciki a zuciyoyin jama’ar jamhuriyar Nijar.
Sakamakon yadda abin ke kawo ƙarshen yanayin ƙuncin rayuwar da aka shiga yau watanni kusan 7 sanadiyar rufe iyakoki da taƙaita zirga-zirga harakokin kasuwanci da tsinke wutar lantarki.
Koda yake wasu na ganin matakin ya zo a makare kasancewar tuni Mali da Bukina Faso da Nijar suka sanar da ficewa daga ƙungiyar ta ECOWAS, don mayar da hankula ga ƙungiyar su ta AES.
KU KUMA KARANTA:ECOWAS ta janye takunkumin da ta saka wa Nijar
A ɗaya gefe kuwa, wasu ‘yan ƙasar ta Nijar sun buƙaci aje zuwa mataki na gaba, ma’ana a gaggauta sallamar hamɓararren shugaban ƙasa Mohamed Bazoum da mai ɗakinsa, sannan lokaci ya yi da ya kamata hukumomin mulkin sojan Nijar su fitar da jadawalin ayyukan gwamnatin riƙon ƙwarya don bai wa ‘yan siyasa damar soma shirye-shiryen zaɓen dimokuraɗiyya.
Kamfanoni da dama sun tafka asarar ɗimbim kuɗaɗe a sanadiyar takunkumin da CEDEAO ko ECOWAS ta ƙaƙaba wa Nijar, saboda haka wasu ‘yan ƙasa ke fatan ganin an fara maganar biyan diyya.
Kawo yanzu mahukuntan jamhuriyar ta Nijar ba su bayyana matsayinsu ba dangane da shawarwari da taron na Abuja ya tsayar.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano