Shugabannin ƙasashen ƙungiyar AES sahel za su gudanar da taron ƙoli a Yamai

Shugabanin gwamnatocin mulkin sojan Burkina Faso, Mali da Nijar na shirin gudanar da taronsu na farko a ƙarƙashin inuwar ƙungiyar AES a ranar Asabar 6 ga watan Yuli a birnin Yamai.

Taron dai na da nufin jaddada haɗin kan da ke tsakanin ƙasashen uku ne bayan da a watan Janairun da ya gabata suka fice daga ƙungiyar ECOWAS.

Waɗannan ƙasashe na fama da aika-aikar kungiyoyin ta’addanci saboda haka babbar maganar kuɗaɗen bai ɗaya taron zai tattauna hanyoyin da za’a tunkari wannan lamari da ke haddasa kisan ɗimbim jami’an tsaro da fararen hula.

KU KUMA KARANTA:ECOWAS na shirin ƙaddamar da kuɗin bai ɗaya da zai yi aiki a ƙasashen ƙungiyar

Sanarwar fadar shugaban majalissar CNSP na cewa kaftin Ibrahim Traore na Burkina Faso da Kanal Assimi Goita na Mali zasu sauka birnin Yamai da la’asariyar ranar Juma’a a albarkacin taron ƙoli na farko na shugabanin ƙasashen AES da zai gudana a ranar asabar.

Tare da mai masauƙin baƙi Janar Abdourahamane Tiani na Nijar waɗannan shugabanin gwamnatocin mulkin soja za su tattauna akan matsalolin da ke addabar ƙasashen uku.

A watan Fabrairun da ya gabata ne ministoci daga ƙasashen Mali, Nijar da Burkina Faso a ƙarshen taron da suka gudanar a Ougadougou suka shawarci shugabanin ƙasashen su yi nasu taron don jaddada abubuwan da suka tsayar mafarin wannan haɗuwa ta Yamai da zai kasance lokaci na saka hannu kan takardun tabbatuwar haɗin kai ta yadda za su kasance masu manufofi guda. Abin da Mahamadou Tchiroma AIssami jigo a ƙungiyar ROTAB ya ƙira ci gaba a ƙoƙarin ‘yantar da yankin Sahel.

Batun kuɗaɗen bai ɗaya na kasashen Sahel na daga cikin abubuwan da waɗannan shugabanni za su tsaida magana a kansu kasancewarsa ɗaya daga cikin igiyoyin da ake zargin Faransa na ci gaba da amfani da su don jan zarenta a wajen kasashen da ta yi wa mulkin mallaka.

Nijar, Mali da Burkina Faso sun faɗa ƙarƙashin mulkin soja sakamakon lalacewar al’amuran tsaro inda ƙungiyoyin ta’addanci ke yaɗa ayyukan da ake zargin ƙasashen yammaci da hannu wajen kitsawa.

Ƙasashen uku dai sun fice daga CEDEAO a watan Janairun 2024 saboda zargin shugabaninta da kaucewa manufofin kungiyar. Sannan sun kafa rundunar haɗin guiwar AES a watan maris ɗin da ya gabata da zummar tunkatar ƙalubalen tsaron da ke haddasa mutuwar sojoji da fararen hula a kowacce daga cikinsu.

Amurka za ta kammala janye sojojinta daga Nijar ranar Lahadi

A ranar Lahadi ne Amurka za ta kammala janye dakarunta da kayan aikinta daga sansanin sojin sama da ke Yamai babban birnin ƙasar Nijar a yammacin Afirka, tare da gudanar da bikin janyewar.

Mataki na gaba a ajandar Amurka shi ne ficewarta daga wani sansanin jiragen yaƙi marasa matuƙi na Nijar, wanda aka shirya kammala shi a watan Agusta.

Ficewar dai ya yi daidai da wa’adin ranar 15 ga watan Satumba da hukumomin Amurka da na Nijar suka amince da shi, bayan da sabbin shugabannin sojojin Nijar suka umarci sojojin Amurka da su fice bayan juyin mulkin da aka yi a Yamai a bara.

KU KUMA KARANTA:Sojojin Amurka za su kammala ficewa daga Nijar 15 ga Satumba

Babban hafsan sojin saman Amurka, Manjo Janar Kenneth Ekman, ya na Nijar domin daidaita hanyoyin fita, ya shaidawa manema labarai ta hoton bidiyo cewa za a mayar da yawancin sojojin Amurka da ke Nijar zuwa ƙasashen Turai. Sai dai ya ce an mayar da ƙananan tawagogin sojojin Amurka zuwa wasu ƙasashen yammacin Afirka.

Yayin da Amurka ta janye wasu muhimman kayan aiki daga sansanonin a Nijar, ba ta lalata kayan aiki da kayayyakin da za a bari a baya ba. Da yake nuna fara mai kyau nan gaba, Ekman ya ce, “Manufarmu a cikin aiwatar da hukuncin shi ne, a bar abubuwa cikin yanayi mai kyau gwargwadon iko. Ya ƙara cewa “Idan muka fita muka bar ta cikin rugujewa, ko kuma muka fita ta rashin mutunci, ko kuma idan muka lalata abubuwa kamar yadda muka tafi, za mu hana zaɓin da ƙasashen biyu ke buƙata na gaba. Kuma har yanzu manufofinmu na tsaro suna cikin ruɗani.”

Janjewar musamman daga sansanin jirage marasa matuƙi wani rauni ne ga Amurka da ayyukanta na yaƙi da ta’addanci a yankin Sahel, babban yankin Afirka, inda masu tada ƙayar baya, masu alaƙa da al-Qaida da ƙungiyoyin IS ke gudanar da ayyukansu.

Ekman, wanda shi ne daraktan dabarun yaƙi na rundunar sojojin Amurka a Afirka, ya ce sauran ƙasashen Afirka da ke cikin damuwa game da barazanar ‘yan tada ƙayar baya da ke yankin Sahel, sun tunkari Amurka kan yadda za su haɗa kai da sojojin Amurka domin yaƙar ‘yan ta’adda. “Nijar ta taimaka mana matuƙa a matsayinmu na wuri saboda tana cikin Sahel kuma tana kusa da wuraren da barazanar ta fi ta’azzara,” in ji Ekman. Yanzu ƙalubalen zai fi wahala inji shi, domin shiga yankin sai an samu daga wajen Nijar.

COPA America: Panama ta yi nasara kan Amurka

Hukumar ƙwallon ƙafa ta Amurka ta yi Allah wadai da kalaman nuna wariyar launin fata ga ‘yan wasanta a ranar Alhamis, bayan da Panama ta yi nasara a kan Amurka da ci 2-1 a gasar cin kofin Copa America.

A wani saƙo da ta wallafa a shafin X, hukumar ƙwallon ƙafa ta Amurka ta ce “Babu shakka, babu wuri a cikin wasa na irin wannan halayya ta nuna ƙiyayya da wariya.”

Sanarwar ta ƙara da cewa “Waɗannan ayyukan ba kawai ba za’a amince da su ba ne, amma kuma sun saɓa wa kimar mutuntawa da haɗa kai da muka ɗauka a matsayin hukuma.”

KU KUMA KARANTA:Manchester City ta lashe Firimiyar Ingila sau huɗu a jere

Timothy Weah, wanda baƙar fata ne, yana ɗaya daga cikin ‘yan wasan da aka ci zarafin su. An bai wa ɗan wasan gaba na Amurka jan kati kai tsaye a minti na 18 da fara wasa, saboda hannu da ya sa ya bugi ɗan wasan Panama a bayan kan sa a lokacin da ƙwallon ta fita wajen filin wasa.

Ɗan wasan Amurka Folarin Balogun ya zura ƙwallo a minti na 22 da fara wasan bayan an bai wa Weah jan kati kafin ɗan wasan Panama Blackman ya farke a minti na 26.

Fajardo ya zura ƙwallo da ta bai wa Panama nasara da ci 2-1 a minti na 83.

Weah ya fitar da wata sanarwa ta kafafan sada zumunta, inda ya bayar da haƙuri tare da neman gafarar waɗanda ya ɓata wa rai.

Yanzu haka dai Amurka, wacce ita ce ke karɓar baƙuncin gasar cin kofin na Copa America, muddin tana son zuwa zagaye na gaba to dole ne ta yi nasara a wasanta da Uruguay da zura ƙwallaye wanda ko da Panama ta yi nasara kan Bolivia za ta samu tsallake wa.