Budurwa ta kai mahaifinta kotu kan auren dole a Kaduna

Wata budurwa mai shekara 20 ta kai mahaifinta ƙara kotu kan ƙoƙarin yi mata auren dole.

Matashiyar mai suna Fatima Aliyu daga garin Kaduna ta shaida wa kotun shari’ar Musulunci cewa tana da wanda take so, amma mahaifinta ke ƙoƙarin yi mata auren dole.

Mahaifin ya ce iyayensa kafin su rasu ne suka zaɓa wa ɗiyarsa mijin aure, shi ya sa yake ƙoƙarin cika alƙawari.

KU KUMA KARANTA: Cin Amana: Kotu ta raba auren da ya yi shekaru 15

Alƙali Malam Aiyeku Abdulrahman, ya ce duk da yake mahaifi na da damar zaɓawa ‘yarsa mijin aure, a wannan gaɓar ƙoƙarin tilasta mata bai dace ba.

Ya shawarci mahaifin ya ƙara haƙuri da ɗiyar tasa.

Alƙalin ya buƙaci mahaifin ya bai wa ‘yarsa damar gabatar da mutumin da take so, sannan a yi bincike, idan babu wani laifi to a bar su su yi aurensu.