‘Yar Najeriyar na yunƙurin lashe gasar girki ta Guinness

Hilda Bassey Effiong wata matashiya ce, ‘yar shekara 27, mai gidan abinci a Najeriya, daga Nsit Ubium LGA a jihar Akwa Ibom.

Ta mallaki gidan abinci a Legas mai suna “My Food by Hilda”. A wannan gasar, Hilda za ta yi girki na tsawon kwanaki 4 ba tsayawa. Shi wannan girki a tsaye za ta yi shi, bai halatta ta zauna ba a yayin girkin.

Ba a yarda ta sha kofi, ko shayi, ko wani abu na ƙara kuzari, ko wani abin ƙara ƙarfin jiki ko wartsakarwa ba yayin dafa abincin ba, amma tanada damar cin abinci, shan ruwa ko ruwan ‘ya’yan itace, da shan glucose.

Wannan gasa ta girki na wakana ne a Amore Gardens, Lekki, Jihar Legas, Najeriya. Tana yin girki dare da rana, ba barci (Safiya, rana, yamma, da dare. Don haka dare 4 za ta yi ba barci.

Tana da hutun mintuna 5 kacal a kowace awa (ma’ana kowane awa 1, tana da haƙƙin ta huta ko hutu na mintuna 5 kacal). Wata majiya ta gano cewa, Hilda ta tsara ma kanta samun hutun mintuna 30 duk bayan sa’o’i 6.
Wato tana haɗa mintunan nata biyar na kowane awa har sai sun zama minti talatin.

Wannan mintuna 30 tana kwashe shi ne a cikin motar asibiti da aka ajiye musamman saboda ita, inda za ta ɗan huta, ta yi amfani da ɗakin wanka, sannan ta sami tantancewar likitoci da duba lafiyarta. Dama an ajiye tawagar likitoci a wurin musammam saboda ita.

Duk abincin da ta dafa, ana raba wa mutanen da ke wurin kyauta. Takan dafa abinci daban-daban lokaci guda. Amma tanada ‘yancin dafa duk abincin da take so. Babu takurawa akan abin da za ta dafa. Ita dai wannan gasa ta duniya kawai so ake a dinga dafa abinci cikin ƙayyadaddun kwanakin, ba a ƙayyade abin da za’a dafa ba. In dai tana girki to an gama magana.

Kowane abinci da aka dafa, da kowane farantin da aka bayar aci ana rubutawa da lissafawa. Yanzu haka, ta dafa abinci kala-kala sama da 115, kawo yanzu, ta ciyar da mutane fiye da 3,000.

Ta fara girkin ne a ranar Alhamis, kuma ana sa ran za ta kammala ranar Litinin 15 ga Mayu, 2023 da yamma. Wadda ke riƙe da kambun gasar da Hilda ke ƙoƙarin karyawa, wata ƙwararriyar mai dafa abinci ce ‘Yar ƙasar Indiya Lata Tandon, wacce ta kafa tarihi a gasar cin kofin duniya ta Guinness na dafa abinci na tsawon awanni 87 da mintuna 45 ba tare da tsayawa ba, a shekarar 2019.

Don karya tarihin, Hilda Baci na ƙoƙarin yin girki na sa’o’i 96, ta yin amfani da ƙarin sa’o’i 9 don karya tarihin duniya a matsayin mace ta farko a duniya da ta kashe irin wannan adadin lokacin tana girki.

Ita dai wannan gasa, Hilda tayi mata laƙani “Cook-a-thon”, jimlar da aka fito da ita daga kalmar ‘Cook’ da “marathon”.

Yanzu haka dai, Hilda ta fara gajiya, amma mutanen da ke kusa da ita suna taya ta bata baki don ƙara mata ƙwarin gwiwa. Kuma suna tare da ita yayin da take dafa 247, ko da daddare. Hatta Gwamnan Lagos, Sanwo Olu, yaje gurin don bata ƙwarin gwiwa, shima kuma ya ci abincin ƙwararriyar. Makaɗa da mawaƙa suma duk sun je, don ba da nishaɗi gare ta, da kuma mutanen dake gurin.

Yawancin kayan abinci da kayan girkin da take amfani dasu wajen wannan aikin, masu ɗaukar nauyinta ne ke samar da su. Don haka, kuɗin da aka kashe akan wannan aikin ba 100% bane daga Hilda. Kamfanin Uber, ɗaya daga cikin masu ɗaukar nauyinta, suna ta bayar da rangwamen kashi 40% zuwa wurin taron ga mutanen da ke son shiga da kuma faranta mata rai a wurin.

Hilda dai ba a sama ta samu ƙwarewa a girki ba, domin mahaifiyar Hilda ita ma mai dafa abinci ce. Tana da gidan abinci mai suna “Calabar Pot” 20.