Rahotanni sun bayyana cewa wasu ‘yan bindiga sanye da hijabi sun kai hari a ofishin ‘yan sanda da ke ƙauyen Saki Jiki da ke ƙaramar hukumar Batsari a jihar Katsina, inda suka kashe jami’in ɗansanda guda.
Kakakin Rundunar ’yan sandan jihar, Abubakar Aliyu, wanda ya tabbatar wa manema labarai hakan a ranar Juma’a, 19 ga watan Janairu, 2024, ya ce wani ɗansanda ya samu rauni a harin.
Ya ce lamarin ya faru ne da ƙarfe 8 na daren ranar Alhamis, 18 ga watan Janairu.
KU KUMA KARANTA: ’Yan bindiga sun tarwatsa ƙauyuka 10 a Kaduna
“Jiya (Alhamis) da misalin ƙarfe 8:00 na dare wasu da ake zargin ‘yan bindiga ne sanye da hijabi, sun kai wa jami’an hari a ofishinsu dake ƙauyen Saki Jiki na ƙaramar hukumar Batsari,” in ji PPRO.
“Jami’an sun mayar da martani cikin jarumtaka tare da samun nasarar daƙile harin, amma jami’i ɗaya ya rasa ransa, wani kuma ya samu rauni sakamakon harin.
