Labarai
Sake zaɓen Fintiri, nasara ce ga demokraɗiyya – PDP
Jam’iyyar PDP ta bayyana nasarar da Gwamna Ahmadu Fintiri ya samu a zaɓen Gwamnan Jihar Adamawa a matsayin wani gagarumin nasara ga dimokuraɗiyya da kuma barin jama’a su zaɓi a’ayinsu.
Jam’iyyar a cikin wata sanarwa da sakataren yaɗa labaranta na ƙasa, Debo Ologunagba, ya fitar a Abuja ranar Talata, ta kuma bayyana sake zaɓen Fintiri a matsayin nasara a kan azzalumai da ‘yan ta’adda da ke neman ƙwace iko da jihar ba bisa ƙa’ida ba.
KU KUMA KARANTA: INEC ta bayyana Gwamna Fintiri a matsayin wanda ya lashe zaɓen gwamnan Adamawa
Ya ce farin cikin da ‘yan ƙasa ke yi ba tare da ɓata lokaci ba a jihar da ma faɗin ƙasar nan a sanarwar da Fintiri ya yi a hukumance a matsayin wanda ya cancanta ya lashe zaɓe ba tare da la’akari da munanan tsare-tsare ba, hakan ya tabbatar da cewa jam’iyyar PDP da ɗan takararta sun kasance zaɓin jama’a.
“Nasarar da Fintiri ta samu ya tabbatar da cewa ba za a iya murƙushe son zuciyar mutane ba ko da kuwa makircin azzalumai, masu mulki da masu ƙwacen mulki.
“Makircin wasu ‘yan ƙalilan waɗanda, da tsananin kishi, suka nemi murguɗa mulkin dimokaraɗiyyar mu, da murƙushe harkokin zaɓe, da yin sulhu a ɓangaren shari’a, da murƙushe jama’a da kuma kafa tsarin mulkin da bai da ce ba a harkokin siyasa.”
Mista Ologunagba ya jinjinawa jajircewa da al’ummar jihar suka nuna wajen bijirewa yunƙurin da kwamishinan zaɓe na INEC Hudu Ari da sauran su ke yi na kawo ruɗani a jihar.
“Jam’iyyar mu ta kuma yaba wa jami’in kula da masu kaɗa ƙuri’a na jihar Adamawa, Mohammed Mele bisa jajircewarsa wajen tsayawa tsayin daka wajen tabbatar da adalci, bin doka da oda da dimokuraɗiyya wajen gudanar da aikinsa.”
Ya kuma jinjinawa irin rawar da masu sa ido kan zaɓukan ƙasa da ƙasa da na cikin gida da kafafen yaɗa labarai da ƙungiyoyin farar hula da sauran masu kishin Najeriya suka taka wajen tabbatar da cewa an baiwa jam’iyyar PDP da Alhaji Fintiri wa’adin mulkin da ‘yan ƙasa suka yi cikin ’yanci ba tare da masu maye gurbinsa ba.
Ya taya Fintiri da al’ummar jihar Adamawa murna, ya kuma buƙaci gwamnan da ya ci gaba da gudanar da ayyukansa na kawo sauyi ga al’umma bisa tsarin dimokuraɗiyya da tsare-tsare da manufofin jam’iyyar PDP.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano
Pingback: ‘Yan sanda sun kama Yunusa Ari, kwamishinan zaɓe da aka dakatar a Adamawa | Neptune Prime Hausa
Pingback: Gwamnan Bauchi ya zama shugaban ƙungiyar Gwamnonin PDP | Neptune Prime Hausa