NBS ta ayyana Yobe a matsayin jihar da ta fi kowace jiha sauƙin rayuwa
Jihar Yobe ta zama jiha mafi sauƙin rayuwa a Najeriya, bisa ga rahoton ƙididdigar farashin kayayyaki na watan Yuli 2025 (CPI) da Hukumar Ƙididdiga ta Ƙasa (NBS) ta fitar a ranar Juma’a.
Rahoton wanda ya auna matsakaicin sauyin farashin kayayyaki da kuma kayayyakin masarufi da suka haɗa da na abinci da sauransu, ya sanya jihar Yobe sama da sauran jihohi goma a fannin tsadar rayuwa.
Yobe ita ce ta kasance mafi ƙarancin hauhawar farashin kayayyaki a ƙasar nan da kashi 11.43 cikin ɗari na watan Yuli, wanda ya ragu sosai daga 13.5% a watan Yuni. Hakazalika, hauhawar farashin kayan abinci ma ya ragu zuwa 15.1%, ƙasa daga 17.9% da aka samu a watan da ya gabata.
KU KUMA KARANTA: Hauhawar farashin kaya ya sauƙa zuwa kashi 22.22% a watan Yuni — NBS
Manazarta na alaƙanta wannan kyakkyawar ɗabi’a kan yadda gwamnatin jihar Yobe ke matsa ƙaimi wajen shigar da matasa a harkar noma, da nufin samun wadatar abinci da kuma samar da abinci na dogon lokaci. Hakan, ba wai kawai ya ƙara samar da abinci na cikin jihar ba, har ma ya taimaka wajen daidaita farashin kayan abinci a faɗin jihar.
Bugu da ƙari, rahoton ya nuna cewa, sauye-sauyen da aka samu a harkar tsaro a faɗin jihar ta Yobe, ya taimaka wajen samar da ingantaccen yanayin tattalin arziƙi, wanda ya ƙara samar da sauƙi ga mazauna jihar.
Hukumar NBS ta nuna ci gaban da ake samu a yanayin zamantakewa da tattalin arziƙi na Yobe, yana ba da kyakkyawan fata a cikin matsanancin hauhawar farashin kayayyaki a Najeriya.
