Hatsari
Manoma 4 sun mutu a hatsarin kwale-kwale a Nasarawa
Aƙalla mutum huɗu ne suka mutu a wani hatsarin kwale-kwale a ƙaramar hukumar Awe da ke jihar Nasarawa.
Aminiya ta gano cewa kwale-kwale da ke jigilar manoman shinkafa daga gundumar Ubbe a ƙaramar hukumar Nasarawa Eggon, ya kife ne a wani kogi da ke ƙauyen Hunki na Ƙaramar Hukumar Awe a ranar Litinin da daddare.
Wakilinmu ya samu labarin cewa tuni aka kwaso gawarwakin waɗanda suka mutu zuwa ƙauyen domin tantance su.
Waɗanda suka mutu sun haɗa da Alkali Congo, Shedrack Dauda, Mashack Dauda, da kuma Akolo Moses.
KU KUMA KARANTA: Kwale-kwale ya kama da wuta a Neja, yara biyu sun mutu
Kakakin Rundunar ’yan sandan Jihar, DSP Ramhan Nansel, wanda ya tabbatar da faruwar lamarin a Lafiya, babban birnin Jihar a ranar Talata, ya bayyana cewa har yanzu ba a gano direban jirgin ba.
Ya ce, “Lamarin ya faru ne jiya [Litinin]; manoman na dawowa daga gona lokacin da kwale-kwale ya kife.
“Amma an gano gawarwaki huɗu, kuma an ceto mutum ɗaya daga cikinsu.
“Sai dai har yanzu ba a gano matukin jirgin ba, amma ana ci gaba da ƙoƙarin gano shi.
Muƙaddashin Kwamishinan ’yan sandan jihar ya jajanta wa iyalan waɗanda suka mutu, ya kuma yi addu’ar Allah ya jikan su.”
Wakilinmu ya ruwaito cewa, a baya-bayan nan mutum 12 ne suka rasa rayukansu sakamakon wani hatsarin kwale-kwale da ya rutsa da su a kogin Kogi Kungra Kamfani da ke unguwar Arikiya a ƙaramar hukumar Lafia.
Jirgin sojin Najeriya ya faɗo a Kaduna
Wani jirgin sama na sojin Najeriya ya yi hatsari a ƙauyen Tami da ke yankin Karamar Hukumar Igabi a Jihar Kaduna.
Wani mazaunin yankin ya ce jirgin sojin mai sauƙar ungulu ne, kuma ya yi hatsari ne da misalin karfe 5 na asubar Litinin din nan.
Mazauna yankin sun bayyana cewa matukin ya fito daga cikin tarkacen jirgin da ya fado.
Bayan nan sojoji suka yi gaggawar zuwa suka yi wa yankin kawanya tare da fara bincike.
Sojojin sun kuma hana mutane isa wurin da tarkacen jirgin yake.
KU KUMA KARANTA: Najeriya ta dakatar da ayyukan kamfanin jirgin samanta
An ce jirgin yana tsaka da aikin sintiri a yankin ne ya samu matsala, lamarin da ya haddasa faduwarsa.
Kawo yanzu Hedikwatar Rundunar Sojin Sama ta Najeriya ba ta fitar da sanarwar game da lamarin ba.
Wata motar fasinja da ta taso daga Bauchi ta yi hatsari a Inugu kuma mutum 16 daga cikin fasinjoji 18 dake motar maza 14 mata 2 sun mųțtu, wasun su ma ba a iya gane su don sun ƙone ƙurmus.
‘Yan sanda sun ce lamarin ya faru da yammacin jiya Talata, 30 ga watan Afrilu a babban titin garin Ekwegbe.
KU KUMA KARANTA: Fasinjoji sun ƙone ƙurmus a hatsarin mota a Kogi
Motar ƙirar Toyota Hummer Bus ce 18 seater dauke da lambar Bauchi, DAS 215 XA, kuma an rubuta “Masha Allah” a jikin motar.
Don haka Kwamishinan yan sanda na Enugu ke roƙon jama’a duk wanda Allah yasa ya san wani daga cikin fasinjojin to a tuntubi rundunar a 08098880172 ko 08086671202
Ana fargabar mutane da dama sun rasa rayukansu bayan da wata tankar mai ta kama da wuta a hanyar East-West Road a birnin Fatakwal da ke jihar Rivers a kudancin Najeriya.
Jaridun Punch da na Vanguard sun ruwaito cewa lamarin ya faru ne da misalin ƙarfe 9:45 na daren Juma’a.
Bayanai sun yi nuni da cewa bayan da tankar ta mai ta kama da wuta, ta shafi motoci aƙalla goma da ke jerin cunkoson ababen hawa a birnin na Fatakwal.
KU KUMA KARANTA:Matatar man Fatakwal za ta koma bakin aiki cikin watan Afrilu – Kyari
Wani da ya shaida lamarin ya faɗawa jaridar Vanguard cewa ya ji ƙara har sau biyu masu firgitarwa daga baya kuma hayaƙi ya turnuƙe sararin samaniya.
“Idan kuna da ‘yan’uwa a Fatakwal ku ƙira su don ku ji lafiyarsu” Wani mazaunin birnin na Fatakwal mai suna Bassey Esang Don, ya wallafa a shafinsa na Facebook.
Ya zuwa lokacin haɗa wannan rahoto ba a san musabbabin fashewar da ta auku ba ko iya sanin adadin mutanen da suka mutu.
Faɗuwar tankar mai ta kama da wuta ba baƙon abu ba ne a Najeriya, inda a wasu lokuta mutane kan yi rububin zuwa kwasar man idan yana Malala.
Daga nan ne kuma akan samu akasi har wuta ta kama ta laƙume rayukan mutane.
Wannan al’amari na faruwa ne yayin da farashin mai ya ƙara tsada a Najeriya inda litar mai ta kusa kai wa Naira 1,000 a sassan ƙasar.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano