Kotu
Kotu ta raba auren wata 10 ta hanyar “Khul’i”
Wata kotu mai daraja ta ɗaya da ke Kubwa, Abuja, ta raba auren wata 10 da aka yi tsakanin wata ma’aikaciyar gwamnati, Wasilat Saka da mijinta, Tajudeen Jimoh, ta hanyar “Khul’i”.
Khul’i wata hanya ce da mace za ta iya rabuwa da mijinta a Musulunci, ta hanyar mayar da sadaki da duk abin da ta samu a lokacin rayuwarsu tare, ko kuma ba tare da mayar da komai ba, kamar yadda ma’aurata ko alƙali suka yi ittifaƙi.
Alƙalin kotun, Ibrahim Rufa’i, ya raba auren ne a bisa tsarin shari’ar Musulunci, bayan da Saka ta yi addu’ar sakin aure ta hanyar khuli bisa dalilin rashin soyayya da rashin so.
Rufa’i ya umarci Saka da ta mayar wa Jimoh sadakin Naira 50,000 sannan ta yi “Iddah” na wata uku kamar yadda addinin Musulunci ya tanada, kafin ta sake yin wani aure.
Ya ce Jimoh ya ƙi bayyana gaban kotu sau ɗaya tun da aka gabatar da ƙarar a watan Yuni kuma bai aika da wakili a kotun ba.
KU KUMA KARANTA: Ta roƙi kotu ta raba aurensu, saboda rashin kulawa daga mijinta
Ya ƙara da cewa mai gabatar da ƙara na kotu, Mista Dangana Bawa ne ya miƙa wa Jimoh da kansa, wanda ya miƙa wa kotun shaidar hidima.
Tun da farko Saka ta shaida wa kotun cewa ta auri Jimoh ne bisa tsarin shari’ar Musulunci a shekarar 2022, inda ta ƙara da cewa auren bai haifar da ‘ya’ya ba.
Sai dai ta shaida wa kotun cewa ita ba ta da sha’awar auren, inda ta roƙi kotun da ta raba auren a kan rashin son juna da kuma rashin jituwar da ba za a iya sasantawa ba.
“Ina roƙon kotu ta raba aurena ta hanyar “Khuli”, a shirye nake in mayar wa wanda ake ƙara sadakinsa Naira 50,000,” inji ta.
Wata kotu a Jihar Anambra da ke Kudancin Najeriya ta yanke wa wani tsohon ma’aikacin banki hukuncin ɗaurin shekara 121 a gidan yari.
Hukumar da ke Yaƙi da Masu Yi Wa Tattalin Arziƙin Najeriya Zagon-Ƙasa wato EFCC ce ta shigar da shi ƙara inda ta zarge shi da almundahana ta naira miliyan 112.
Mai Shari’a S.N. Odili ne ya yanke wannan hukuncin bayan ya samu Nwachukwu Placidus wanda tsohon manaja ne a bankin FCMB da laifin almundahana ta naira miliyan 112,100,000.
A wata sanarwa da EFCC ta fitar, ta ce an gurfanar da shi ne a ranar Talata 27 ga watan Maris ɗin 2018 kan zarge-zarge 16 waɗanda suka haɗa da laifin yin jabu da sata da ƙarya.
KU KUMA KARANTA: Kotun Najeriya ta bayar da umarnin dakatar da asusun banki fiye da dubu 1
Sai dai Mista Placidus ya musanta duka zarge-zargen da ake yi masa bayan an karanto masa su a kotu.
“A lokacin shari’ar, EFCC ta hanyar lauyanta Mainforce Adaka Ekwu ya gabatar da shaidu huɗu waɗanda suka bayar da takardu masu muhimmanci a matsayin hujjoji,” in ji sanarwar.
Mai shari’a Odili ya yanke wa Mista Placidus hukuncin ɗauri na shekara tara bisa zargi na biyu sai hukuncin ɗaurin shekara huɗu kan zargi na huɗu.
Sannan Mai Shari’ar ya yanke masa hukuncin ɗauri na shekara tara-tara kan zargi na biyar har zuwa na zargi na 16.
Wata Kotun Majistire da ke Ƙaramar Hukumar Kontagora a Jihar Neja, ta bayar da umarnin a tsare Amina Abashe da ake zargi da watsa wa mijinta Shehu Abdullahi tafasasshen ruwa.
‘Yan sanda sun gurfanar da wadda ake zargin ce a gaban kuliya bisa laifin yi wa mijinta mummunan rauni da ya saba wa sashe na 245 na kundin dokoki shari’a.
Ɗan sanda mai shigar da ƙara, ASP Ɗanladi Marafa, ya shaida wa kotun cewa matar da ake zargi ta kwarawa mijinta ruwan zafi a sakamakon wani sabani da ya shiga tsakaninsu.
Sai dai bayan karanto ƙunshin tuhumar da ake yi wa matar da ake ƙara, ta musanta aikata laifin.
KU KUMA KARANTA: Ta zuba wa mijinta ruwan zafi saboda ta ƙi zuwa biki da ita
Lauya mai gabatar da ƙara, ya buƙaci da a tisa ƙeyar matar da ake tuhuma zuwa gidan gyaran hali, domin bai wa masu ƙara damar lura da lafiyar wanda abin ya shafa da a yanzu yake samun kulawa a Babban Asibitin Kontagora.
Ya kuma buƙaci a ɗan ba su lokacin domin tabbatar da tsaro da kare matar da ake tuhuma.
Alƙaliyar Kotun, Khadijah Dauda, ta ɗage sauraron ƙarar zuwa ranar 16 ga watan Afrilu.
Babbar Kotun Jihar Kano mai lamba 3 ƙarƙashin jagorancin Mai Shari’a Faruk Lawan ta sake gurfanar da matar nan Hafsat Sani Suraj da ake zargi da kisan wani hadimin gidanta mai suna Nafi’u Hafiz.
An sake gurfanar da wacce ake zargin ne bayan da aka ɗauke shari’ar daga gaban kotun Mai Shari’a Zuwaira Yusuf.
Lauyan gwamnati wanda ke gabatar da ƙara, Barista Halima Yahuza Ahmad ta shaida wa kotun cewa a ranar 21 ga watan Disamba, 2023 Hafsa Suraj ta yi amfani da wuka inda ta caccaka wa marigayin a kirjinsa da wasu sassa na jikinsa, lamarin da ya yi sanadiyyar rasuwarsa.
Ana tuhumar Hafsat Suraj da laifin kisa, laifin da ya saɓa da sashe na 221 na kundin pinal kod.
Sai dai Hafsat wadda aka fi sani da Hafsat ChuChu ta sake yin gum da bakinta yayin da aka tambaye ta ko ta fahimci abin da takardar ƙarar ta ƙunsa.
Lauyan da ke kare ta, Barista Sani Ammani ya nemi kotun da ta bayar da umarnin gwada kwakwalwarta a Asibitin Masu Larurar Kwakwalwa na Gwamnatin Tarayya don sanin shin ko tana da lafiyar da za a iya yi mata shari’a dogaro da sashe na 278(3) na Kundin Dokokin Manyan Laifuka na shekarar 2019.
Sai dai masu gabatar da ƙara sun soki roƙon na lauyan masu kariya, inda suka nemi kotun ta ɗauki wacce ake ƙara a matsayin ta musanta zargin aikata laifin.
A yayin haka kuma, kotun ta gurfanar da ƙarin mutane uku da suka haɗa da mijin Hafsat, Dayyabu Abdullahi da kuma Adamu Muhammad da Nasidi Ibrahim da ake zargin sun taimaka mata wajen aikata laifi tare da ɓoye gaskiyar lamarin da bayar da bayanan ƙarya game da dalilin rasuwar marigayi Nafi’u.
KU KUMA KARANTA: Kotu ta sa a duba ƙwaƙwalwar Hafsat Chuchu
“Waɗanda ake zargin sun yi amfani da bayanan ƙarya wajen sanar da ’yan uwan Nafi’u game da dalilin rasuwarsa inda suka ce ya rasu ne dalilin aikin basir da aka yi masa.”
Waɗanda ake zargin sun musanta aikata laifukan da ake zarginsu da shi da suka saba da sashe na 97 da 277 da 178 na kundin pinal kod.
Har ila yau, masu gabatar da ƙarar sun nemi kotun da ta cire sunan wanda ake ƙara na huɗu, wato Malam Nasidi Muhammad daga cikin jerin waɗanda ke fuskantar shari’ar.
Sai dai lauyoyin kariya, Barista Sani Ammani da Barista Haruna Magashi da Barista Fauziyya Yusuf sun yi suka kan wannan roƙon.
Lauyoyin sun ce Kwamishinan Shari’a ne kaɗai yake da wannan damar na cire sunan wani daga cikin shari’a dogaro da sashe na 124 da 125 na Kundin Dokokin Manyan Laifuka.
Bayan sauraron ɓangarorin ne Alƙalin Kotun, Mai Shari’a Faruk Lawan ya bayar da umarnin tsare waɗanda ake zargi a gidan gyaran hali.
Kazalika, ya ɗage sauraren shari’ar zuwa wata rana da ba a ambata ba don yanke hukunci kan batun cire sunan wanda ake zargin daga cikin shari’ar.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano