Jagoran PDP a Yobe, Adamu Waziri ya fice daga jam’iyar ya koma ADC
Fitaccen ɗan siyasa, jagoran jam’iyar PDP a jihar Yobe, tsohon ministan harkokin ‘yansanda, Alhaji Adamu Maina Waziri, ya miƙa takardar ficewa daga jam’iyyar PDP a hukumance, inda ya sanar da zama mamba a sabuwar jam’iyyar haɗaka ta ADC. Waziri, na hannun daman tsohon mataimakin shugaban ƙasa Atiku Abubakar, kuma ɗan jam’iyyar PDP ne ya bayyana hakan a wata takardar murabus da ya fitar, wadda Neptune Prime ta samu kwafin, mai kwanan wata 2 ga watan Yuli, 2025 da kuma aikewa da shugaban jam’iyyar PDP, na gundumar Dogo Tebo a ƙaramar hukumar Potiskum ta jihar Yobe. Wasiƙar ta ce, “ Zan sanar da ku a hukumance daidai da tanadin kundin tsarin mulkin PDP na 2017 (kamar yadda aka gyara) na ficewa daga jam’iyyar ku.
KU KUMA KARANTA: Akwai yiyuwar nan gaba kaɗan Ganduje ya dawo jam’iyyar PDP – Sule Lamido
“Don dalilai na tarihi, a sani cewa shugabancin jam’iyyar a halin yanzu da kuma yanayin da jam’iyyar ke ciki ba su dace da shugabancin babbar jam’iyyar da ya kamata ta ba mambobinta wani tsari na daban don amfani da ‘yancinsu da ‘yancin zaɓi a kowane zaɓe.
“Abin mamaki ne yadda jam’iyyar ta kafa a shekarar 1998 don tunkarar gwamnatin da ba ta dimokuradiyya ba, kuma ta yi nasarar jagorancin dimokuradiyya mai ɗorewa, ta rasa yadda za ta yi a matsayin babbar jam’iyyar adawa da kwatankwacin matsayina na ‘yan siyasa.
“Ina fatan in yi muku maraba a cikin ADC don maido da fatan dimokuradiyya ga ƙasarmu masoyi.”
