Daga Ibraheem El-Tafser
Hukumomi a Sifaniya sun ce aƙalla mutane 11 ne suka mutu sakamakon gobara da ta tashi a wani gidan rawa a birnin Murcia da ke kudu maso gabashin ƙasar.
Gobarar ta tashi ne a wani shahararren gidan rawa a yankin Atalayas, da safiyar ranar Lahadi.
Wani bidiyo da ya karaɗe intanet ya nuna yadda wuta ke ci a ginin da kuma hayaƙi da ya turnuƙe sama.
Ma’aikatan bayar da agajin gaggawa na can suna neman mutanen da suka ɓata kuma ke cikin harabar gidan rawan lokacin da wutar ta tashi.
Magajin garin Murcia Jose Ballesta ya faɗa wa tashar talabijin ta Spain 24, cewa an ayyana zaman makoki na kwanaki uku a garin.
Mutane sun fara isa gidan rawan domin ƙoƙarin neman ‘yan’uwansu da suka ɓata.
Jami’an agajin sun ce sun gano gawawwaki shida zuwa yanzu.
Kawo yanzu dai ba a kai ga gano abin da ya haddasa gobarar ba, wadda ta tashi a lokacin da gidan rawan ke cike da mutane.
